Ministria: Pas datës 20, s’ka shërbim

Sistemi shëndetësor publik vijon të përballet me problematika serioze që prekin drejtpërdrejt qytetarët, nga mungesa e shërbimeve bazë deri te vonesat e tejzgjatura për ekzaminime jetike. Një realitet që rëndohet edhe më shumë nga kufizimet buxhetore, të cilat ndikojnë në ndërprerjen periodike të analizave në spitalet publike.

Për herë të parë, Ministria e Shëndetësisë dhe Mirëqenies Sociale ka pranuar zyrtarisht se pas datës 20 të çdo muaji, në shumë raste, analizat ndalen për shkak të kufizimeve financiare të kontratave koncesionare. Një situatë që krijon një zinxhir vonesash dhe pasoja të drejtpërdrejta për pacientët.

Edhe pse ministrja Evis Sala ka deklaruar se kjo problematikë pritet të marrë zgjidhje brenda vitit, panorama reale në terren tregon një tjetër histori.

Në spitalin rajonal të Beratit, pritjet për analiza nuk janë më çështje ditësh apo javësh, por arrijnë deri në katër muaj. Për shumë pacientë, kjo përkthehet në një dilemë të fortë: të presin duke rrezikuar përkeqësimin e shëndetit, apo të drejtohen drejt klinikave private me kosto të papërballueshme.

Një nga rastet më domethënëse është ai i 80-vjeçarit Qani Arapaj, historia e të cilit u publikua nga emisioni investigativ Fiks Fare. I moshuari vuan nga probleme me prostatën dhe ka nevojë për ndërhyrje kirurgjikale, por përpara operacionit duhet të kryejë disa analiza të detyrueshme.

Megjithatë, ai është përballur me një pritje deri në katër muaj për kryerjen e tyre në sistemin publik. Alternativa e vetme mbetet sektori privat, ku kostoja arrin rreth 24 mijë lekë të vjetra – një barrë e rëndë për një pensionist.

“Jam 80 vjeç dhe vuaj prej muajsh. Mjeku më tha që duhet operacion, por pa analizat nuk bëhet. Më kërkuan të pres katër muaj, ndërkohë që gjendja ime nuk pret. Në privat nuk kam mundësi, mezi përballoj ilaçet,” shprehet ai.

Nga ana tjetër, përfaqësues të spitalit kanë sqaruar se rastet jo urgjente duhet të ndjekin radhën, duke lënë të hapur vetëm mundësinë për një afrim të kufizuar të datës së analizave, por jo një zgjidhje të menjëhershme.

Pas ndërhyrjes mediatike, Qaniut iu mundësua një datë më e afërt për kryerjen e analizave, konkretisht më 1 maj 2026. Një lehtësim relativ, por që nuk ndryshon thelbin e problemit.

Ky rast nxjerr në pah një krizë më të thellë në sistemin shëndetësor: akses të kufizuar në shërbime bazë dhe një hendek gjithnjë e më të madh mes qytetarëve që kanë mundësi të paguajnë dhe atyre që mbeten në pritje, shpesh në kurriz të shëndetit të tyre.