Denoncimi i gazetarit Klodian Tomorri për abuzimet më të neveritshme të kohëve të fundit: helmimi i qytetarëve me ushqim të kalbur dhe çmimi i jetës sonë si mall në rafte supermarketesh
Një gjizë me katër vatra myku, një datë skadence që tallet me logjikën dhe një çmim që dyfishon abuzimin. Kjo është Shqipëria e supermarketit të pasigurisë ushqimore dhe fitimeve të pangopura.
Në vendin ku mishin e pulës e shesin me salmonelë dhe luleshtrydhet me pesticide, një gjizë me katër vatra myku është veç një detaj shtesë në albumin grotesk të një shteti që e ka bërë helmimin e qytetarëve një praktikë të zakonshme.
“Gjiza Valle Verde” e rrjetit Conad, e blerë më 26 mars në Tiranë, në pikën përballë Ministrisë së Drejtësisë, vinte me datë skadence 12 maj – por sa hapej kapaku, brenda të priste një ekspozitë myku. Katër vatra të mëdha, të shpërndara me kujdes sikur të ishte produkt artizanal.
Por nuk mbaron këtu. Sepse përveçse helm, kjo gjizë është edhe dyfish më e shtrenjtë se në Itali: në Shqipëri shitet 499 lekë, ndërkohë që në vendin e origjinës kushton 2.75 euro – gati dy herë më lirë. Fitimi? Gjysmë-kolonial. Moraliteti? Zero.
A është kjo vetëm neglizhencë? Apo krim me dashje?
Ka vetëm dy arsye përse një gjizë mund të mbushet me myk para datës së skadencës:
- Ka qëndruar në kushte të gabuara frigoriferike.
- I është manipuluar data e skadencës.
Të dyja skenarët janë një krim ndaj shëndetit të qytetarëve, dhe në një vend normal, do të kërkonin ndërhyrje të menjëhershme të organeve të drejtësisë dhe sigurisë ushqimore. Por në Shqipëri, jo vetëm që nuk ndodh kjo, por kush guxon të flasë, rrezikon edhe të paditet nga kompania.
Po, e lexuat mirë: ose e ha dhe rri urtë, ose ta tregojmë ne gjyqin!
Përse AKU hesht? Sepse është kthyer në mbrojtëse të korporatave, jo të jetës.
Qytetarëve shqiptarë u është ofruar një meny e tmerrshme:
- Mish me salmonelë në 157 restorante dhe çerdhe.
- Luleshtrydhe me pesticide të ndaluara në BE.
- Mandarinat që Europa na i kthen si të rrezikshme, i hamë vetë.
- Dhe tani: gjizë me myk, por me çmim si për parmezanin artizanal të Parmës.
Dhe ndërkohë, AKU bën status në Facebook, por nuk ndalon asgjë. E gjitha kjo ndodh nën sytë e një qeverie që i thotë popullit: Duro, o milet, se do ta marrim pasaportën e BE-së.
Por qytetarët s’mund të rrinë më urtë.
Nëse nuk e ndalim këtë regjim të babëzisë, nesër do të pimë qumësht me bojë të bardhë dhe do ta quajmë “bio”. Sepse në Shqipëri, gjithçka blihet: data e skadencës, etiketa, kontrolli, dhe mbi të gjitha – heshtja.
Është koha të kërkojmë përgjegjësi. Jo vetëm nga supermarketet që po na helmojnë për fitim, por edhe nga institucionet që heshtin si ortakë të krimit.
