Protestë me arkivol! Banorët e Hotolishtit paralajmërojnë Rama-Ballukun: Ose ne, ose ju

Banorët e Hotolishtit kanë nisur sot një protestë tjetër duke bllokuar rrugën kryesore Librazhd-Prrenjas, ndërsa nuk kanë munguar tensionet mes tyre dhe efektivëve të policisë.

Banorët kërkojnë shpronësime me çmime tregu dhe ndërtimin e tunelit në mënyrë që fshati të mos cenohet nga projekti i Korridorit VIII i cili nëse zbatohet siç është planifikuar, e ndan Hotolishtin në 2 pjesë dhe 30 shtëpi do të shemben.

Banorët propozojnë ndërtimin e një tuneli, që do të shmangte dëmet mbi pjesën historike të fshatit dhe mjedisin përreth, duke lejuar që rruga të ndërtohet pa cënuar komunitetin.

Përveç rrugës së projektuar, një tjetër pikë e nxehtë për protestuesit është kompensimi i pamjaftueshëm që shteti u ka ofruar. Banorët pohojnë se shumat e premtuara nuk mjaftojnë për të rindërtuar shtëpitë e tyre në zona të tjera, ndërsa për tokat bujqësore, çmimi prej 174 lekësh për metër katror cilësohet si i papranueshëm dhe i padrejtë.

Zemërimi i tyre është përqendruar veçanërisht ndaj zëvendëskryeministres dhe ministres së Infrastrukturës, Belinda Balluku, e cila sipas banorëve nuk iu përgjigj thirrjes për një takim që ishte paralajmëruar për të martën. Ky refuzim është parë si një tjetër shenjë e injorimit të shqetësimeve të tyre legjitime.