Renato Salin i njohur si Renato “Çami”, i cili disa ditë para zgjedhjeve të 11 majit mori nga Rajmonda Bufi kontratën 48 milionë lekë për furnizim me karburant. Në këtë tender nuk u afrua asnjë biznesmen, sepse dihej që fitues ishte paracaktuar “i forti” i Fierit.
Tenderi me dy “flamuj të kuq”
Bëhet fjalë për tenderin e Bashkisë Roskovec me objekt furnizimin me “Karburant, vaj dhe graso” me fond limit 3 999 629,00 lekë.
Ky tender ishte shpallur nga Rajmonda Bufi më 6 shkurt 2025, por në ditën e hapjes së zarfeve me ofertat procedura e prokurimit u anulua. Në dokumentet që shqyrtuam në Agjencinë e Prokurimit Publik del se nuk u dorëzua asnjë ofertë.
“Bazuar në procesverbalin nr. 1272 prot datë 17.02.2025 të vlerësimit të KVO nuk rezulton asnjë Operator ekonomik pjesëmarrës, rrjedhimisht kjo procedurë anulohet”, theksohet në këtë vendim.
Bufi e ka rishpallur procedurën më 24 shkurt 2025 dhe ka caktuar për mbajtjen e tenderit datën 10 mars 2025.
Tenderi është anuluar sërish sepse asnjë biznes nuk mori pjesë. Duket qartë se në këtë bashki tenderat janë në paracaktuar prandaj nuk ka pjesëmarrje të lartë.
Në bazë të ligjit ky tender nuk mund të rishpallet, por duhet hartuar nga e para. Por në Bashkinë Roskovec njohin vetëm Bufin, jo ligjin. Kështu më 8 prill 2025 tenderi hapet për herë të tretë. Data e fundit për dorëzimin e dokumenteve ishte më 18 prill 2025. Merrte pjesë vetëm një operator ekonomik dhe ky ishte “A G A -1” SHPK me pronar Renato Salin. Përpara zgjedhjeve, më 5 maj 2025, firma e Renato Salit u shpall fituese, megjithëse kishte propozuar ofertën sa 100% e fondit limit.
Sipas dokumenteve, vlera përfundimtare e kontratës së firmosur nga Bufi për Salin është 4 766 246.28 lekë.
Për shkeljet e kryera, procedura e këtij tenderi ka marrë nga Open Data Albania dy “flamuj të kuq” që tregojnë risk të lartë korrupsioni: Njëri është për mungesë konkurrence, ndërsa tjetri është për anulim të tenderit më shumë se dy herë.
Kush është Renato Sali (alias Renato Çami)?
- I njohur si figurë e botës së krimit në Fier.
- I përfshirë në ngjarje kriminale të rënda që nga viti 1998.
- I hetuar nga SPAK për vrasje me pagesë, trafiqe ndërkombëtare, pastrim parash dhe lidhje me zyrtarë të lartë.
- Aktualisht në hetim në një dosje voluminoze nr. 75/2, përfshirë edhe persona të afërt si nipi i tij, “Tarjoni”.
E kaluara penale dhe dëshmi të reja:
- I pandehur për vrasjen e Xheladin Qelisë (1998), por shpëton për mungesë provash.
- I përfshirë në hetime për organizatë kriminale, armëmbajtje pa leje, falsifikim (2004).
- I përmendur nga bashkëpunëtorët e drejtësisë Skerdi Tasi, Agim Boriçi dhe Nuredin Dumani si financues i vrasjeve me pagesë ndaj emrave të njohur si:
- Agim dhe Ilir Boriçi (ngjarje në 2018)
- Arben Isufaj (“Ben Qimjq)
-
Të gjithë këta personazhe, janë përmendur nga dëshmia e bashkëpuntorit të SPAK, Skerdi Tasi, sipas të cilit kanë paguar para dhe apartamente në këmbim të vrasjes me armë të Agim Boriçit dhe Ilir Boriçit, ngjarje e ndodhur në Prill 2018.
Njëherësh emri i Renato Sali, është përmendur dhe nga dëshmia e Agim Boriçit, i cili ka dyshuar se sulmin me armë në lokalin e tij në Fier, dyshonte se e kishte organizuar dhe financuar Renato Sali.
Nga ana tjetër dhe Nuredin Dumani, bashkëpunëtori i SPAK gjatë një ballafaqimi në Mars 2023, mes bashkëpunëtorit të SPAK, Nuredin Dumani dhe Henrik Hoxhaj, Dumani përmend Renato Çamin, si person që kërkonte jo vetëm eliminimin e Dokles, por dhe të mikut të tij, Arben Isufaj alias “Ben Qimja”.
”…kam diçka për të shtuar që s’e kam thënë më përpara. Doja të flisja për një çështje që nuk është diskutuar fare më parë. Teksa flisja një ditë me Henrik Hoxhaj, më ka dërguar në aplikacionin “Matrix” fotografi me screnshoot të bisedave që Henrik Hoxhaj, fliste me një person që quhet Renato Çami, i cili interesohej në lidhje me vrasjen e “Ben Qimes” dhe Endrit Dokles. Personi jepte 1 milion e 200 mijë euro për vrasjen e këtyre dy personave…”-ka treguar i penduari Nuredin Dumani.
Kreu i SPAK, Altin Dumani deklaroi se ky personazh i botës së krimit që komandon pushtetin në Fier dhe qeveritarë në Tiranë, është futur në hetim intensiv për trafiqe ndërkombëtare, vrasje, pasuri më burim aktivitetet kriminal e afera korrupsioni me zyrtarët e shtetit…
Nga ana tjetër, Sali ka krijuar një “perandori” ekonomike financiare me biznese tregtim karburantesh, bar-kafe-restorante, hotele, tregti makinash, ndërtime pallatesh në Fier e Tiranë dhe çdo vit merr nga 2 milionë Euro tenderë shtetëror nëpërmjet firmës së tij “AGA-1 Sh.p.k”.
Ai sot është një sipërmarrës, që ka fituar dhjetëra milionë euro nga tenderët publikë të bashkive dhe të Albpetrol-it. Në vitin 2014 ai ka blerë për 2.6 milionë lekë (50%) të kuotave në shoqërinë AGA-1 sh. p. k., në Fier, me objekt të veprimtarisë tregtimin e karburanteve, sektorin e ndërtimit, import-eksport, etj. Shoqëria është regjistruar në 2005-ën më kapital fillestar 100 mijë lekë.
Shoqëria AGA-1, që prej vitit 2016 e deri para pak muajve ka fituar dhjetëra tenderë nga pushteti vendor. Nga Bashkia e Fierit ka fituar 23 tenderë dhe 15 të tjerë prej Bashkisë së Roskovecit, me vlerë mbi 790 milionë lekësh ose rreth 7.5 milionë euro. Pothuajse gjysma e tyre, 15 tenderë, janë me “flamur të kuq” për mungesë konkurrence. Bashkia e Fierit prej dekadash drejtohet nga socialistët dhe që prej vitit 2015 nga Armando Subashi, ish-gjyqtar dhe ish-deputet i Partisë Socialiste. Prej vitit 2015 edhe në krye të Bashkisë së Roskovecit është socialistja Majlinda Bufi.
Prej vitit 2019 AGA-1 ka fituar 10 tenderë nga Albpetrol, me vlerë 695 milionë lekë, afro 7 milionë euro. Nga 10 tenderë të fituar, gjashtë identifikohen me “flamur të kuq”. Në pesë raste ka munguar konkurrenca, ndërsa në një prokurim janë skualifikuar të gjithë garuesit, përveç fituesit. Thuajse të gjitha tenderat e fituara janë për furnizimin e këtyre institucioneve me karburante të llojeve të ndryshme.
Ndërsa, kryetarja e Bashkisë Roskovec, Rajmonda Bufi, ka në ngarkim disa kallëzime në SPAK.
