Cila është drama e provimeve të maturës?!

Elona Caslli

Në paradhomën e daljeve të rezultateve në provimet e maturës, do të shohësh prindër të stresuar, plot ankth për të parë pikët. A ka fituar?! A e arrin dot degën që do?!
Dalja e tezës së provimit nuk cënon procesin- thotë ministrja dhe po ta mendosh ftohtë, nuk e cënon sepse procesi është tashmë i cënuar. Për sa kohë del teza jashtë dyerve te sallave të testimit, imagjino se çfarë ndodh brenda sallave.
Drama e këtij procesi është përvëlimi i një ëndrre. Pse e them këtë?!

Sepse maturantët e njohin njëri-tjetrin, e dinë përkushtimin e njëri- tjetrit gjatë viteve të studimit dhe një maturant që ka studiuar fort mund të shohë shokun e tij të ketë një rezultat më të lartë falë një teze të trafikuar nga brenda jashtë ose të plotësuar nga brenda.
Këtu fillon goditja e parë. Përvëlimi një ëndrre. Mungesë merite. Sy që shuhen dhe shpresa që zbrazen.

E teksa i shkruaj këto fjalë ndërmend më vjen rrëfimi i një ekonomisti shumë të aftë, i cili dikur më ka rrëfyer se ëndrra e tij kish qenë të bëhej kirurg, por Partia e Punës i kish nxjerrë të drejtën e pamerituar dikujt tjetër për të studiuar në fushën e mjekësisë.

Në ligjëratë të drejtë rrëfimi i ekonomistit në fjalë vazhdon” Njeriut, që më përvëloi ëndrrën, nuk i harroj kurrë. Ka një kafene pranë shtëpisë ku banoj dhe kur përballem me të i them gjithmonë: Sot do të isha kirurg. Ti ia dhe të drejtën e studimit dikujt që nuk e meritonte”

Post Scriptum- Të përvëlohen ëndrra në diktaturë e pranoj se në diktaturë ke vetëm një të drejtë- Të bindesh. Të përvëlohen ëndrra në një vend që premton pasaportën evropiane, por paradoksalisht nuk është i aftë të administrojë siç duhet një provim mature, këtë nuk mund ta kuptoj.