Valës së ekzekutimeve në Iran i janë shtuar raste të tjera të rënda, pasi më 5 prill 2026 autoritetet iraniane kanë ekzekutuar dy të rinj të akuzuar për përfshirje në protestat e fundit kundër regjimit.
Bëhet fjalë për Shahin Vahediparast, 31 vjeç, dhe Mohammad Amin Biglari, 19 vjeç, të cilët sipas burimeve të opozitës iraniane ishin mbështetës të Organizatës së Muxhahedinëve të Popullit të Iranit. Ata akuzoheshin për “moharebeh” (luftë kundër Zotit) dhe “korrupsion në tokë”, akuza që shpesh përdoren nga sistemi gjyqësor iranian ndaj kundërshtarëve politikë.
Të dy u dënuan me vdekje pas një procesi gjyqësor të zhvilluar në Teheran, nga një trupë gjykuese e drejtuar nga Abolghasem Salavati, një figurë e kontestuar për rolin e tij në dënimet ndaj aktivistëve. Vendimi u konfirmua më pas nga instanca më e lartë gjyqësore e vendit.
Sipas raportimeve, disa ditë para ekzekutimit, të rinjtë ishin transferuar në izolim në Burgu Ghezel Hesar, një burg i njohur për mbajtjen e të dënuarve me vdekje. Një tjetër i ri, Amirhossein Hatami, vetëm 18 vjeç, ishte ekzekutuar më herët, më 2 prill.
Reagime të forta kanë ardhur nga Maryam Rajavi, presidente e Këshillit Kombëtar të Rezistencës së Iranit, e cila i cilësoi ekzekutimet si një tregues të frikës së regjimit ndaj revoltës popullore dhe rritjes së pakënaqësisë në vend.
Ajo theksoi se këto veprime janë dëshmi e presionit të brendshëm ndaj autoriteteve dhe paralajmëroi se dhuna shtetërore nuk do të mbetet pa reagim nga kundërshtarët e regjimit. Në të njëjtën kohë, Rajavi i bëri thirrje komunitetit ndërkombëtar që të reagojë me vendosmëri.
Apeli i saj përfshin ndërhyrje urgjente nga Këshilli i Sigurimit i Kombeve të Bashkuara, me qëllim ndalimin e ekzekutimeve dhe mbrojtjen e të burgosurve politikë, të cilët sipas saj rrezikojnë të përballen me të njëjtin fat në të gjithë vendin.
