Publik.al | Investigim | Qershor 2025
Pas kontrolleve të befasishme të agjentëve të BKH-së në banesat dhe zyrat e biznesmenit Ergys Agasi, në kuadër të një hetimi të nisur nga SPAK, vëmendja mund të zhvendoset natyrshëm te emri i Ermal Beqirit, ortaku i Agasit në kompaninë EA Solutions sh.p.k, një ndër përfituesit më të mëdhenj të kontratave publike për teknologji informative.
Profili i kompanisë EA Solutions dhe lidhjet me institucionet shtetërore
Sipas të dhënave zyrtare nga Thesari i Shtetit, kompania EA Solutions ka arkëtuar në vetëm 3 vitet e fundit 6.6 milionë euro nga fondet publike, përmes 11 transaksioneve të mëdha, të shpërndara nga institucionet më të rëndësishme shtetërore: Komisioni Qendror i Zgjedhjeve (KQZ), Bashkitë Mat, Kavajë, Vlorë, Vorë, AKU, Reparti Ushtarak nr. 1001, dhe të tjera. Vetëm nga KQZ, EA Solutions ka marrë mbi 3.2 milionë euro në vitin 2024–2025 për shërbime të integrimit të listave zgjedhore dhe trajnimeve për zgjedhje.
Kjo kompani deklaron vetëm një të punësuar, dhe megjithatë, arrin të kryejë shërbime teknologjike të natyrës kritike për institucionet kyçe të shtetit shqiptar. Si është e mundur?
Ermal Beqiri “hija teknologjike” pas milionave
Ermal Beqiri ka qenë për një kohë të gjatë figura më pak e ekspozuar në marrëdhëniet publike të EA Solutions, duke i lënë skenën më tepër Ergys Agasit. Por në dokumentet tregtare, ai rezulton të jetë aksioner, drejtues teknik dhe ndoshta koka operative pas kompanisë që ka fituar një listë të gjatë tenderash të dyshimtë.
Hetimi që ka përfshirë Ergys Agasin përfshin jo vetëm skemat e fitimit të paracaktuar të tenderave, por sipas burimeve të Publik.al, SPAK po analizon pajisjet elektronike të sekuestruara, përfshirë laptopët, celularët dhe sistemet e komunikimit të përdorura nga Agasi dhe stafi i tij.
Nëse në këto pajisje rezulton se Ermal Beqiri ka luajtur rol aktiv në përgatitjen e ofertave, fiktivitetin e stafit, apo në koordinimin me zyrtarë publikë për të diktuar fituesin e tenderit atëherë rreziku penal për të është real dhe i afërt.
Skemat e dyshuara: si fitonte EA Solutions?
Nga analiza e faturave dhe përshkrimeve të transaksioneve, konstatohet një model i përsëritur:
- Ofrohen shërbime të vështira për t’u audituar (“certifikata SSL”, “instalim antivirus”, “aplikacione mobile”, “faqe web”, “integrim listash zgjedhore”).
- Në shumicën e rasteve, mungon konkurrenca reale: fituesi paracaktohet, dhe kontratat lidhën në fund të vitit fiskal.
- Faturat kanë një ngjashmëri të habitshme në strukturë, me përshkrime të përgjithshme dhe referenca që nuk mund të verifikohen publikisht.
Kjo formë operimi përkon me skemat klasike të “tenderëve të brendshëm”, ku oferta bëhet nga një kompani e vetme, për një shërbim të vështirë për t’u vlerësuar nga kontrolli i brendshëm, ndërsa dokumentacioni prodhohet pas miratimit politik.
Pse SPAK nuk e ka prekur ende Beqirin?
Deri më tani, Ermal Beqiri nuk është përmendur publikisht në dosjet hetimore të SPAK. Por kjo nuk do të thotë se ai është i pastër. Mundësitë janë dy:
- Ose SPAK po mbledh prova dhe po ruan diskrecionin për një goditje më të gjerë të rrjetit,
- Ose Beqiri ka ndihmës të fuqishëm politikë që e mbrojnë përkohësisht nga hetimi penal.
Në të dyja rastet, nuk është çështje nëse, por kur emri i tij do të përfshihet zyrtarisht në hetim.
A do të shtrihet hetimi edhe te tenderat e AKSHI-t?
Një tjetër pikë e errët është lidhja mes EA Solutions dhe tenderave të teknologjisë të shpërndarë nga Agjencia Kombëtare e Shoqërisë së Informacionit (AKSHI). Publik.al ka raportuar më parë se individë të afërt me Ermal Beqirin dhe Ergys Agasin kanë qenë të lidhur me kompani që kanë përfituar kontrata edhe nga AKSHI, si Soft & Solution dhe Infosoft Systems.
Nëse hetimi për Agasin zgjeron perimetrin në rrjetin e kompanive fiktive dhe ofertave të koordinuara, atëherë do kemi të bëjmë me një strukturë kriminale të mirëorganizuar për përfitim nga fondet publike, ku Beqiri është një nga nyjet kyçe.
Konkluzioni: A do shkojë Ermal Beqiri pas Agasit?
Nëse drejtësia funksionon siç duhet, Ermal Beqiri duhet të jetë objekt hetimi i menjëhershëm. Ai nuk është vetëm “ortaku i Agasit” por ai është bashkëarkitekti i një modeli të dyshuar për vjedhjen sistematike të buxhetit të shtetit, nën hundën e të gjithë institucioneve.
Me miliona euro që qarkullojnë për shërbime të pakontrollueshme dhe një kompani me vetëm një të punësuar, rasti EA Solutions është simboli i korrupsionit të sofistikuar teknologjik që nuk duhet të kalojë pa ndëshkim.
