Një aksident tragjik i ka marrë jetën 39-vjeçarit shqiptar Edmond Gjoci, banues në Tuoro sul Trasimeno, Itali. Ai ishte bashkëshort dhe baba i një vajze të vogël.
Ngjarja e rëndë ndodhi në mëngjes, në rrugën rajonale 71, në zonën e Riccios pranë kufirit me rajonin e Umbria-s. Sipas autoriteteve italiane, Gjoci po priste në anë të rrugës një person që do ta shoqëronte për në punë, kur u përplas për vdekje nga një automjet që kishte devijuar nga rruga.
Makina drejtohej nga një 19-vjeçar, i cili sapo ishte pajisur me leje drejtimi. Dyshohet se ai humbi kontrollin e mjetit për arsye ende të paqarta, duke bërë që automjeti të dilte nga rruga dhe ta përplaste për vdekje Gjocin. Forcat e policisë italiane dhe karabinierët e Cortonës kanë nisur hetimet për të zbardhur plotësisht rrethanat e aksidentit.
Lajmi ka tronditur komunitetin shqiptar në Itali dhe më gjerë. Edmond Gjoci përshkruhet si një njeri i përkushtuar ndaj familjes, që po përpiqej të siguronte një jetë më të mirë për të shoqen dhe vajzën e tij të vogël. Tani, familja e tij përballet me një humbje të pariparueshme, ndërsa miqtë dhe të afërmit kërkojnë drejtësi dhe një hetim të plotë për këtë tragjedi që mund të ishte shmangur.
