Një lindje e veçantë ka ndodhur në maternitetin “Mbretëresha Geraldinë” në Tiranë, ku kanë ardhur në jetë tre vajza – trinjaket Iliriana, Amaya dhe Cataleya. Ngjarja e bukur ka sjellë emocion dhe gëzim të jashtëzakonshëm për familjen e re dhe për stafin mjekësor që ka ndjekur me përkushtim procesin e lindjes.
Trinjaket janë në gjendje të mirë shëndetësore dhe nën kujdesin e ekipit të profesionistëve të maternitetit, i cili ka treguar standarde të larta përballë një sfide të rrallë dhe të ndjeshme siç është lindja e shumëfishtë.
Të tilla raste mbeten të rralla në vendin tonë dhe përbëjnë jo vetëm një moment gëzimi për familjen, por edhe një dëshmi e përkushtimit dhe profesionalizmit në sistemin shëndetësor. Familja e re ka pritur me emocion këtë moment, ndërsa bashkë me të gjithë të afërmit dhe stafin mjekësor, ndan gëzimin për ardhjen në jetë të tri vajzave të vogla.
Trinjaket Iliriana, Amaya dhe Cataleya tashmë janë bërë pjesë e historisë së këtij materniteti, si një ndër lindjet më të veçanta të këtij sezoni. Shqipëria feston me ta!
