Investimet e kompanive shqiptare jashtë vendit arritën nivelin më të lartë historik në vitin 2025. Sipas Banka e Shqipërisë, vlera totale shkoi në 241 milionë euro, me rritje 25% krahasuar me një vit më parë.
Rreth 65% e këtyre investimeve janë injektime të reja kapitali në kompani të kontrolluara jashtë vendit, ndërsa pjesa tjetër përbëhet kryesisht nga fitime të riinvestuara. Megjithatë, pesha e investimeve dalëse mbetet e ulët, vetëm 18% e investimeve të huaja hyrëse në Shqipëri.
Në total, investimet e huaja direkte në vend arritën në 1.64 miliardë euro në 2025, në rritje për të pestin vit radhazi, duke thelluar diferencën me kapitalin që del jashtë. Bilanci neto mbetet negativ me rreth 1.33 miliardë euro.
Tendenca e zgjerimit të bizneseve shqiptare jashtë vendit po forcohet, me grupe të mëdha që po shtrijnë aktivitetin në Europë dhe SHBA. Ndërkohë, Kosova mbetet destinacioni kryesor rajonal.
Sipas Banka Qendrore e Kosovës, stoku i investimeve shqiptare në Kosovë ka arritur në 551 milionë euro deri në fund të 9-mujorit 2025, duke e renditur Shqipërinë si investitorin e tretë më të madh në vend. Investimet janë përqendruar kryesisht në pasuri të paluajtshme, ndërtim, prodhim dhe tregti.
