Një pamje e pazakontë ka ngjallur kureshtje mes ndjekësve, pasi një qytetar nga Lezha ka filmuar një krijesë të rrallë në bregdetin e Shëngjinit.
Gjatë një shëtitjeje pranë detit, një qytetar ka vënë re një gjallesë që në pamje të parë të kujton një yll deti, por që sillet krejt ndryshe. Me pesë tentakula të gjata e shumë fleksibël, të cilat lëvizin në mënyrë të pavarur dhe të shpejtë, krijesa krijon një pamje të pazakontë, gati si të ishte pjesë e një filmi fantastiko-shkencor.
I befasuar nga ajo që pa, qytetari ka kërkuar ndihmë për identifikimin e saj, duke theksuar se nuk kishte hasur kurrë më parë një organizëm të tillë në ujërat tona.
Në fakt, kjo krijesë njihet në botën shkencore si Ophiuroidea, e njohur ndryshe si “ylli i brishtë”. Ajo i përket të njëjtës familje me yjet e detit, por dallon për mënyrën e lëvizjes: përdor krahët e saj të hollë dhe elastikë për t’u zhvendosur, shpesh në mënyrë shumë më të shpejtë dhe “gjarpëruese”.
Këto organizma zakonisht jetojnë në thellësi ose fshihen nën gurë dhe rrallëherë dalin në sipërfaqe, çka e bën këtë rast edhe më interesant për t’u parë nga afër.
Prania e tyre në brigjet tona nuk është e rrezikshme për njerëzit, por mbetet një dëshmi e biodiversitetit të pasur detar që shpesh kalon pa u vënë re.
Po ju, a keni hasur ndonjëherë krijesa të pazakonta gjatë pushimeve në bregdet?
