Hysen dhe Kevin Neza në pranga, në kërkim Jurgen Neza

Zbardhet skema e rrëmbimit dhe dyshimet për të shkuarën e Florian Sulës

Publikohen fotot e Hysen dhe Kevin Nezës, dy të rinjve të arrestuar për rrëmbimin e një biznesmeni në Tiranë, ndërsa në kërkim është shpallur edhe Jurgen Neza, i dyshuar si bashkëpunëtor në të njëjtën ngjarje.

Sipas hetimeve paraprake, tre personat dyshohet se kanë marrë peng një biznesmen 32-vjeçar në zonën pranë ish-Parkut në kryeqytet, në momentin kur ai po largohej nga një lokal ku kishte konsumuar kafe.

Burime nga hetimi bëjnë me dije se autorët e kanë ndjekur lëvizjen e tij dhe, sapo ai ka hyrë në një rrugicë, i janë afruar të maskuar. Dy prej tyre, të identifikuar si vëllezërit Neza, dyshohet se mbanin maska dhe syze për të fshehur identitetin, ndërsa një tjetër ishte i maskuar me kapelë dhe syze.

Sipas akuzës, ata janë prezantuar si agjentë të Byrosë Kombëtare të Hetimit (BKH), duke përdorur këtë mashtrim për ta detyruar biznesmenin të hipte në automjet, me qëllim rrëmbimin e tij.

Hetimet tregojnë se viktima, i angazhuar në sektorin e ndërtimit dhe i kthyer së fundmi nga jashtë vendit, dyshohet se ka qenë i vëzhguar më herët dhe se lëvizjet e tij janë ndjekur për një periudhë kohe para ngjarjes.

Pas rrëmbimit, autorët i kanë kërkuar fillimisht 2 milionë euro, ndërsa më pas, pas refuzimit dhe dhunës fizike, shuma është ulur fillimisht në 1 milion euro dhe më pas në 500 mijë euro. Viktima është mbajtur gjatë natës në një magazinë në zonën e Xhafzotajt në Durrës, ku dyshohet se është ushtruar dhunë ndaj tij.

Ai është liruar në orët e para të mëngjesit, me kushtin që të siguronte paratë e kërkuara, ndërsa menjëherë pas lirimit është paraqitur në polici dhe ka kallëzuar ngjarjen, duke ndihmuar në identifikimin e autorëve.

Sipas hetimeve, identifikimi i tyre është bërë edhe përmes pamjeve të kamerave të sigurisë përgjatë itinerarit të lëvizjes, ku autorët shfaqen të maskuar dhe të veshur me rroba të zeza. Dyshohet gjithashtu se autorët kanë marrë informacion paraprak për viktimën nga persona ende të paidentifikuar, të cilët mund t’u kenë dhënë të dhëna mbi gjendjen e tij financiare.

Sipas të dhënave që po qarkullojnë në kuadër të hetimeve, i ashtuquajturi biznesmen ndërtimi, të cilin e morën peng në zemër të Tiranës më 31 mars, dy vëllezërit Jurgen dhe Kevin Neza, 28 dhe 25 vjeç, dhe djali i xhaxhait, Hysen Neza, 33 vjeç, me qëllim për t’i marrë 2 milionë euro, rezulton të jetë Florian Sula. Ai përmendet në burime jozyrtare si një individ i lidhur me aktivitetin e call centerave, ndërsa ndaj tij janë ngritur më herët dyshime për përfshirje në skema mashtrimi dhe pastrim parash. Megjithatë, këto mbeten pretendime që nuk janë konfirmuar përfundimisht nga një vendim gjykate.

Ngjarja e rrëmbimit, për të cilën akuzohen vëllezërit Jurgen dhe Kevin Neza si dhe i afërmi i tyre Hysen Neza, konsiderohet një akt i rëndë kriminal dhe po hetohet nga autoritetet. Paralelisht, burime të ndryshme sugjerojnë se edhe aktiviteti i vetë personit të marrë peng mund të jetë pjesë e verifikimeve, për shkak të profilit të tij dhe dyshimeve që qarkullojnë mbi burimin e të ardhurave.

Kush është Florian Sula?

Florian Sula përmendet në disa burime si një person me origjinë nga Divjaka, i cili dyshohet se ka qenë i përfshirë në aktivitetin e call centerave, një sektor që në disa raste është lidhur me skema mashtrimi ndaj qytetarëve të huaj përmes investimeve të rreme online. Emri i tij është përmendur gjithashtu në lidhje me individë të tjerë të hetuar më parë për veprimtari të ngjashme, megjithatë këto lidhje nuk janë zyrtarizuar nga institucionet përkatëse.

Po sipas këtyre burimeve, Sula dyshohet se ka investuar vitet e fundit në pasuri të paluajtshme, kryesisht në zonat bregdetare dhe në Tiranë. Këto investime kanë ngritur pikëpyetje mbi burimin e financimit, duke u përmendur si pjesë e mundshme e skemave të pastrimit të parave. Sërish, bëhet fjalë për dyshime që kërkojnë verifikim të plotë nga organet ligjzbatuese.

Autoritetet shqiptare dhe partnerët ndërkombëtarë kanë treguar prej kohësh vëmendje ndaj aktivitetit të call centerave të paligjshëm dhe lidhjeve të tyre me pastrimin e parave në sektorë si ndërtimi. Në këtë kuadër, mbetet për t’u parë nëse hetimet aktuale do të shtrihen edhe në këtë drejtim dhe nëse do të ketë zhvillime konkrete lidhur me personat e përfshirë.