KISH hap garën për rijetëzimin e tre stadiumeve të tjerë, skema si tek “Arena Kombëtare”
Publikuar në: Publik.al
Edhe pse nuk ka ende një projekt konkret apo të miratuar zyrtarisht, Korporata e Investimeve Shqiptare (KISH) ka nisur tashmë procedurat për “rijetëzimin” e tre prej stadiumeve më të njohura në vend: “Niko Dovana” në Durrës, “Flamurtari” në Vlorë dhe “Skënderbeu” në Korçë.
Sipas dokumenteve të siguruara nga redaksia jonë, KISH ka shpallur procedurat konkurruese publike për përzgjedhjen e partnerëve privatë, të cilët do të hartojnë dhe zbatojnë projektet e investimit. Ashtu si në rastin e stadiumit “Qemal Stafa” – që u transformua në “Arenën Kombëtare” përmes një formule partneriteti publik-privat ku ndërtimi i kullave ishte pjesë e marrëveshjes – nuk përjashtohet mundësia që edhe në këto tre stadiume të aplikohet i njëjti model.
Kush po përfiton nga rijetëzimi?
Në mungesë të transparencës së plotë për projektet konkrete, shqetësimi kryesor mbetet i njëjtë: a do të përfundojnë këto hapësira publike në funksion të interesave të një grushti ndërtuesish dhe jo të sportit?
Nga përvoja me “Arenën Kombëtare”, ku godina shumëkatëshe financoi pjesërisht ndërtimin e stadiumit, shumë qytetarë dhe ekspertë të urbanistikës kanë ngritur alarmin se stadiumet janë kthyer në pretekst për ndërtime komerciale që përfitojnë vetëm një segment të vogël të lidhur me qeverinë.
Stadiumet në shënjestër:
- “Niko Dovana”, Durrës – një ndër arenat me histori në futbollin shqiptar, me potencial të madh tregtar për shkak të pozicionit të favorshëm në qytet.
- “Flamurtari”, Vlorë – i vendosur pranë bregdetit, ky stadium është një pasuri e rrallë urbane në një nga qytetet më të lakmuara për ndërtim.
- “Skënderbeu”, Korçë – stadium me traditë, i rrethuar nga zona me zhvillim turistik, që mund të bëhet magnet për investitorë të interesuar për rezidenca dhe hotele.
Një tjetër “pakt me ndërtuesit”?
Rijetëzimi i stadiumeve pa projekt të bërë publik, pa konsultim me komunitetet lokale dhe pa një debat real mbi funksionin e tyre, ngre pikëpyetje të forta mbi interesat që qëndrojnë pas kësaj lëvizjeje. A janë këto ndërhyrje për sportin dhe komunitetin, apo për të rritur metrat katrorë për ndërtim?
