Publikohen pamjet e operacionit ku u arrestuan 4 persona!

Një operacion i gjerë policor, i koduar “Procedimi”, ka goditur një grup të strukturuar kriminal që merrej me trafikimin e armëve dhe kultivimin e kanabisit në disa qytete të vendit. Operacioni është finalizimi i një procedimi penal të ndjekur për disa muaj me metoda speciale të hetimit, në drejtimin e Prokurorisë së Fierit.

Nga hetimet u zbulua se disa shtetas, në bashkëpunim me njëri-tjetrin, trafikonin armë dhe municione të kalibrave të ndryshëm, të cilat në disa raste futeshin ilegalisht nga Kosova përmes kufirit të gjelbër në Morinë. Gjithashtu, grupi rezultoi i përfshirë në kultivimin dhe shpërndarjen e kanabisit në Fier, Lushnjë, Durrës, Shkodër dhe Kukës.

Operacioni u zhvillua në disa pika të vendit, ku u kryen 8 kontrolle banesash, 2 kontrolle në ambiente të dyshuara si magazina armësh, dhe 3 kontrolle automjetesh.

Sipas Policisë, grupi vepronte i organizuar, me qëllim trafikimin e armëve nga Kosova për shitje tek persona të përfshirë në veprimtari të tjera kriminale. Organizatorët kryesorë të këtij grupi ishin B. B. dhe Q. Sh., ndërsa pjesëtarët e tjerë merreshin me sigurimin e armëve dhe gjetjen e blerësve. B. B. dyshohet gjithashtu se kishte rolin kryesor në organizimin e kultivimit dhe tregtimit të kanabisit.

Siç shihet nga pamjet e shpërndarë nga policia, janë sekuestruar maska me fytyrë njeriu, arme, municione dhe unifroma policie.

Gjatë operacionit u sekuestruan:

4000 fidanë kanabisi (2000 të mbjellë në tokë dhe 2000 të kultivuar në kubikë);

3 armë zjarri automatike, 2 armë gjahu dhe 636 fishekë;

5000 fara kanabisi;

2 radio të ngjashme me ato të Policisë, 2 uniforma policie dhe 1 maskë me paruke;

3 automjete dhe 10 celularë.

Në banesën e njërit prej të ndaluarve në Durrës, shtetasi N. O., u sekuestrua një armë zjarri pistoletë, që ai tentoi ta hidhte nga dritarja në momentin e ndërhyrjes së Policisë.

Të ndaluarit janë:

B.B., 48 vjeç, nga Kallmi i Fierit, me të kaluar kriminale në Itali, ku është dënuar me 30 vite burg për “Shfrytëzim prostitucioni” dhe “Armëmbajtje pa leje”;

N.O., 53 vjeç, nga Durrësi, me precedent penal për armëmbajtje pa leje;

Q.Sh., 48 vjeç, nga Lushnja, i dënuar më parë për vepra penale në fushën e drogës dhe armëve;

B.B., 33 vjeç, nga Divjaka.