Një manovër elektorale e paralajmëruar
Naim Noka
Sot, në orën 11:00, bordi i Entit Rregullator të Energjisë (ERE) do të diskutojë një çështje të shumëpritur: uljen e çmimit të energjisë elektrike. Menjëherë pas kësaj, kryeministri Edi Rama dhe zëvendëskryeministrja Belinda Balluku do të mbajnë një konferencë për shtyp, duke shpallur vendimin që, siç duket, do të sjellë një “lajm të mirë” për qytetarët.
Por, ajo që bie në sy është koha kur kjo masë propozohet: vetëm tre muaj para zgjedhjeve të vitit 2025. A është kjo një masë e menduar për t’i lehtësuar realisht barrën qytetarëve, apo një strategji për të siguruar kapital politik?
Ende pa nisur viti, zëvendëskryeministrja Balluku u kujdes të paralajmëronte uljen e çmimit të energjisë, duke theksuar angazhimin e qeverisë për t’u dhënë qytetarëve një çmim më të mirë. Por a është kjo masë rezultat i ndonjë përmirësimi struktural në sektorin energjetik, apo thjesht një taktikë për të fituar zemrat e votuesve?
Të kujtojmë mijëra qytetarë janë arrestuar masivisht për faturat e energjisë elektrike gjatë’ mandatit të parë të Ramës. Por edhe gjatë krizës energjetike të viteve të fundit, qytetarët u përballën me fatura të larta, ndërsa qeveria justifikonte rritjen e çmimeve me faktorët globalë. Tani, ndërsa zgjedhjet afrojnë, papritur duket se këto “faktorë globalë” janë zbutur në mënyrë të mrekullueshme.
Një pyetje themelore: Pse tani?
Zhvillimi i sotëm sjell disa pyetje legjitime:
1.Pse ulja e çmimit nuk u bë më parë?
Nëse qeveria ka pasur mundësinë për të lehtësuar barrën e energjisë, përse ka pritur deri tani?
2.A është kjo një ulje e qëndrueshme?
A kemi të bëjmë me një masë të menduar afatgjatë, apo me një “dhuratë” të përkohshme që do të zhduket pas zgjedhjeve?
3.A është ky një manipulim i hapur elektoral?
Vendosja e masave të tilla në prag të zgjedhjeve ka qenë një taktikë e njohur në politikën shqiptare. A po ndjek qeveria të njëjtin manual të vjetër?
Nga kriza te premtimet elektorale
Gjatë viteve të fundit, qeveria ka përdorur krizën energjetike si justifikim për mosmbajtjen e premtimeve të saj për një sektor më të rregulluar. Megjithatë, qytetarët nuk kanë parë as transparencë, as përmirësime reale në infrastrukturën energjetike. Përkundrazi, shumë prej tyre janë ndjerë të braktisur përballë faturave që nuk përballohen.
Tani, qeveria kërkon të shfaqet si shpëtimtare, por qytetarët kanë arsye të jenë skeptikë. Nëse ulja e çmimit është e mundshme tani, pse nuk ishte e mundshme një vit më parë, kur inflacioni rëndoi mbi çdo familje shqiptare?
Një strategji e njohur
Historia politike shqiptare na ka mësuar se lëvizjet e tilla para zgjedhjeve shpesh kanë qenë të pamenduara mirë për afatin e gjatë. Nga falja e gjobave deri te ndarjet e ndihmave sociale, politikanët kanë përdorur gjithnjë mekanizmat shtetërorë për të siguruar vota.
Në këtë rast, ulja e çmimit të energjisë mund të jetë një hap i domosdoshëm, por mënyra dhe koha kur ndodh e vendos qeverinë në pozitat e një aktori që përdor nevojat bazike të qytetarëve si vegël për fushatë elektorale.
