Në një procedurë prokurimi të zhvilluar nga Bashkia Vau i Dejës, është lidhur një kontratë publike me vlerë 1,789,000 lekë pa TVSH për blerje kompjuterash dhe printerash, me fond limit të shpallur prej 1,898,333 lekësh. Fituese e kësaj kontrate është shpallur kompania INSTANT.AL shpk.
Sipas të dhënave zyrtare të publikuara në portalin openprocurement.al, në këtë procedurë konkurruan katër operatorë ekonomikë: ETRONIC shpk, TIM shpk, INSTANT.AL shpk, dhe Bledi Bilali. Të gjithë operatorët përveç fituesit u skualifikuan, përfshirë edhe ata që ofruan çmime më të ulëta.
Kompania INSTANT.AL, sipas të dhënave të mëparshme nga Qendra Kombëtare e Biznesit (QKB), ka qenë në pronësi të Granit Gjanës dhe Ermal Gjinajt, i cili është bashkëshorti i ish-ministres dhe aktualisht deputetes së Partisë Socialiste, Ogerta Manastirliu. Këto lidhje familjare dhe politike të pronarëve të kompanisë kanë ngritur dyshime mbi paanshmërinë dhe transparencën e procedurës së prokurimit.
Kontrata është lidhur më 15 prill 2025, ndërsa procedura është hapur më 5 mars dhe mbyllur më 17 mars, me shpalljen e fituesit më 26 mars 2025.
Vendimi për të skualifikuar të gjithë ofertuesit e tjerë dhe për të përzgjedhur INSTANT.AL, një kompani e lidhur me figura të njohura politike, duket si shpërblim politik nga Kristian Shkreli për Ogerta Manastirliun dhe Granit Gjanën, gjë krejt normale me fondet publike.
