Shqipëria, një destinacion turistik në rritje vitet e fundit, është bërë gjithnjë e më tërheqëse për vizitorët e huaj, të cilët përballen me bukuritë natyrore të vendit, por shpesh hasin vështirësi në orientimin përmes një sistemi transporti publik disi kaotik.
Megjithatë, viti 2025 sjell një ndryshim të rëndësishëm: të dhënat për transportin publik ndërqytetas janë tashmë të integruara në Google Maps. Kjo do t’ua lehtësojë ndjeshëm udhëtarëve lëvizjen nëpër Shqipëri, duke e bërë të thjeshtë gjetjen e itinerareve, stacioneve dhe lidhjeve mes qyteteve.
Si funksionon?
Tani, për të udhëtuar nga një qytet në tjetrin, mjafton të kërkoni destinacionin tuaj në Google Maps dhe sistemi do të gjenerojë itinerarin automatikisht. Në disa raste, ofrohen më shumë se një opsion, duke marrë parasysh rrugët e ndryshme dhe kohëzgjatjen e udhëtimit.
Shembuj praktikë:
1.Nga Korça në Sarandë:
•Opsioni i parë: Itinerari kalon përmes Gjirokastrës. Nga terminali në Korçë, merrni autobusin GJ5 drejt Gjirokastrës (rrugë që zgjat rreth 3 orë). Më pas, merrni autobusin Gj3 për në Sarandë (1 orë e 10 minuta).
•Opsioni i dytë: Itinerari përmes Përmetit. Nga Korça, merrni autobusin KO32 për në Përmet, më pas GJ19 për në Gjirokastër (1 orë e 10 minuta), dhe përfundoni udhëtimin me linjën e Argjiro Sh.p.k. drejt Sarandës.
•Opsioni i tretë: Linja direkte KO1 nga Korça në Sarandë, e cila zgjat 4 orë e 37 minuta.
2.Nga Durrësi në Tiranë:
•Opsioni i parë: Përmes autostradës Tiranë-Durrës. Nga stacioni në Durrës, merrni autobusin Dr6, që ndalon në Terminalin B të Tiranës. Nga aty, përdorni linjën urbane 4 për të shkuar drejt qendrës së kryeqytetit.
•Opsioni i dytë: Përmes Ndroqit. Nga Plepave në Durrës, merrni linjën Tr65 që ndalon në Terminalin B në Tiranë, dhe vazhdoni me linjën urbane të njëjtë si më lart.
Burimet e të dhënave dhe integrimi
Informacioni në Google Maps është kryqëzuar nga burime të ndryshme, duke përfshirë platformën zyrtare të transportit publik E-Transport, të dhëna nga Bashkia e Tiranës për transportin urban dhe platforma private si Gjirafa Travel.
Një hap përpara për turizmin shqiptar
Ky zhvillim është një lajm i mirëpritur, veçanërisht për Shqipërinë si një destinacion gjithnjë e më të njohur turistik. Megjithëse transporti publik mbetet i kufizuar vetëm në linjat e autobusëve, mungesa e një sistemi hekurudhor funksional është një hendek që mbetet për t’u plotësuar.
Sidoqoftë, ky integrim në Google Maps është një hap i vonuar, por i rëndësishëm, për ta bërë Shqipërinë më të aksesueshme për turistët dhe për të lehtësuar përvojën e tyre. 2025 sjell, të paktën në këtë aspekt, një përmirësim të dukshëm që premton të rrisë më tej kënaqësinë e vizitorëve në vendin tonë.
