Grupet shqiptare të krimit transnacional luajnë një rol të madh në trafikimin e kokainës, heroinës dhe kanabisit në të gjithë Evropën dhe kanë fuqi të madhe ekonomike në një vend kaq të vogël…
Politikanët e opozitës në Shqipëri rrezikojnë të ndiqen penalisht pasi ndezën zjarr dhe hodhën bomba tymuese në Parlament, për të sabotuar një sërë debatesh kyçe.
Incidenti i fundit të hënën erdhi pasi anëtarët e Partisë Demokratike të opozitës refuzuan të lejonin rojet e sigurimit të Parlamentit t’i kontrollonin për materiale të ndezshme, përpara se të merrnin pjesë në seancë. Pas përplasjes me Gardën, politikanët filluan të ndezin flakadanë.
Më 20 nëntor, Sali Berisha, një ish-kryeministër dhe president, si dhe lideri i Partisë Demokratike, protestoi kundër akuzave të tij për korrupsion, akuza që ai i ka hedhur poshtë si të motivuara politikisht.
Deputetët e tij ndezën tymuese për të prishur debatin mbi buxhetin e vitit 2024 dhe ngritën një barrikadë karrigesh te foltorja.
Incidenti i fundit buron nga një betejë e gjatë midis Partisë Socialiste të Ramës dhe rivalëve të saj të hidhur në Partinë Demokratike.
“Berisha pretendon përndjekje politike nga Rama për një sërë akuzash për korrupsion”, tha një diplomat perëndimor me qendër në Tiranë, i cili kërkoi të mos identifikohej për arsye diplomatike. “Është një mosmarrëveshje e hidhur dhe e gjatë mes rivalëve që duket se e urrejnë njëri-tjetrin, që është bërë pak shpërqëndruese ndërsa Shqipëria po punon për anëtarësimin në BE.”
Kombi i vogël ballkanik ka luftuar për të pastruar reputacionin e tij ndërkombëtar për aktivitetin kriminal dhe korrupsionin, teksa Rama fokusohet te integrimi në BE dhe kthimin e Shqipërisë në një destinacion turistik.
“Rama duhet të kalojë një ndarje midis drejtimit të një vendi të varfër në Evropën Jugore që dëshiron të integrohet me BE dhe luftimit të elementeve të krimit të organizuar që dominojnë kryesisht vendin“, tha një zyrtar i zbatimit të ligjit të BE-së që gjurmon tregtinë e kokainës. “Grupet shqiptare të krimit transnacional luajnë një rol të madh në trafikimin e kokainës, heroinës dhe kanabisit në të gjithë Evropën dhe kanë fuqi të madhe ekonomike në një vend kaq të vogël”.
Zyrtari tha se grupet kriminale shqiptare kontrollojnë një pjesë të madhe të tregtisë së kokainës midis Amerikës së Jugut dhe porteve veriore të Evropës në Belgjikë dhe Holandë.
“Shumica e operacioneve të këtyre karteleve janë të përhapura në të gjithë Evropën nëpërmjet grupeve shqiptare, teksa vetë Shqipëria luan një rol kyç në pastrimin e parave dhe investimin kryesisht në ndërtim të fitimeve të drogës. Rama nuk mund ta injorojë këtë fuqi ekonomike, ndaj ka përplasje të shpeshta politike”, tha ai.
Në tetor, Shqipëria u hoq nga lista ndërkombëtare e monitorimit për pastrimin e parave, pas një periudhe katër vjeçare në atë listë.
“Ne mendojmë se ata po përpiqen, por ka ende shenja të rëndësishme që ekonomia mbetet e ndjeshme ndaj aktivitetit të paligjshëm”, tha zyrtari i policisë së BE-së.
Këtë verë analistët vunë në dukje se monedha shqiptare (leku) ishte rritur ndjeshëm ndaj euros. Ndërsa zyrtarët qeveritarë vlerësuan rritjen e turizmit dhe investimeve të huaja për tepricën e eurove, analistët politikë dhe financiarë dyshojnë se flukset e paligjshme të parave luajtën një rol të madh.
“Forcimi i lekut ka ardhur nga faktorë ekonomikë joformalë ose thënë në shqip: nga ekonomia informale apo kriminale”, tha analisti dhe komentatori politik Neritan Sejamini në një intervistë në tetor. /Vice.com”
