Ish-prokurori Karanxha: Bankers Petroleum vodhi Shqipërinë për 20 vite, SPAK të ndërhyjë urgjentisht
publik.al | Një ndër çështjet më të rënda të abuzimit me pasuritë natyrore të Shqipërisë po del sërish në dritë. Ish-prokurori Ervin Karanxha ka hedhur akuza të forta ndaj kompanisë “Bankers Petroleum”, duke e cilësuar aktivitetin e saj 20-vjeçar si një aferë të pastër zhvatjeje ndaj shtetit shqiptar, e cila për vite me radhë është mbyllur me heshtje institucionale dhe ndërhyrje të dyshimta në drejtësi.
Sipas Karanxhës, Bankers ka shfrytëzuar në mënyrë sistematike rezervat nëntokësore të vendit, duke mos i dhënë pothuajse asgjë buxhetit të shtetit. Ai thekson se kjo aferë kap përmasa shumë më të mëdha se çështjet e inceneratorëve apo sterilizimit, dhe përbën një nga krimet më të mëdha ekonomike të tranzicionit shqiptar.
“Kjo është një nga çështjet më të forta të Prokurorisë së Shqipërisë. Janë vjedhur paratë e shtetit shqiptar. Është shfrytëzuar toka për 20 vite dhe nuk kemi asnjë të ardhur në buxhet. Kjo çështje duhet të zbardhet nga SPAK,” – deklaroi Karanxha për mediat.
Sëmundje, ndotje dhe varfëri: trashëgimia e “Bankers” në Fier dhe Ballsh
Ish-prokurori ngre alarmin për pasojat e rënda sociale dhe shëndetësore që kanë lënë pas aktivitetet e kompanisë, sidomos në zonat ku ajo ka operuar si Ballshi, Fieri dhe Patosi. Ai përmend raste të shumta sëmundjesh profesionale, ndotje të tokës dhe ajrit, mungesë kompensimesh dhe një nivel të paprecedent të neglizhencës institucionale.
“Banorët vuajnë nga sëmundje të rënda, nuk kanë përfituar asnjë shpërblim. Janë viktima të një industrie që përveçse nuk solli zhvillim, i la pa shpresë,” – tha Karanxha.
Pagat e fryra si mashtrim fiskal: 300 mijë euro në muaj për individë të veçantë
Një tjetër detaj tronditës i zbuluar nga ish-prokurori janë pagat e fryra në mënyrë fiktive, me qëllim shmangien e tatimeve. Ai përmendi të dhëna të publikuara nga hakerat iranianë, sipas të cilave punonjës të lartë të Bankers merrnin deri në 300 mijë euro në muaj.
“Konstatova që një nga humbjet më të mëdha ishte struktura e pagave të fryra. Kjo nuk ishte pagesë për punë, por mënyrë për të rritur fiktivisht shpenzimet dhe për të shmangur taksat. Janë miliona euro që i janë vjedhur buxhetit të shtetit,” – theksoi Karanxha.
Dosja e mbyllur nga Adriatik Llalla: Drejtësia u ndal në gjysmë
Në një nga momentet më të rënda të deklaratës së tij, Karanxha përmendi ndërhyrjen e ish-kryeprokurorit Adriatik Llalla, i cili sipas tij ka pushuar hetimet për çështjen Bankers me justifikimin se “nuk e bënte dot”.
“Llalla duhet të pyetet pse e mbylli dosjen. A pati presione? Kush e ndaloi drejtësinë të veprojë në këtë rast kaq të rëndë?” – pyeti publikisht Karanxha.
SPAK të hetojë që nga kontrata e vitit 2004
Ish-prokurori kërkoi që SPAK të marrë urgjentisht në dorë këtë dosje dhe të hetojë të gjitha aspektet e aferës, që nga kontrata e lidhur në vitin 2004, deri tek shkeljet fiskale, ekologjike dhe sociale që kanë ndodhur në këto dy dekada.
“Janë kushte skandaloze kontrate. Janë bërë lëshime të frikshme. Shqiptarët po varfërohen çdo ditë ndërsa pasuritë e tyre grabiten nga kompani që nuk kanë lënë asnjë të mirë pas. Është koha që SPAK ta vendosë këtë çështje në listën e prioriteteve,” – përfundoi ai.
Një çështje që nuk mund të mbetet në harresë
Rasti i “Bankers Petroleum” nuk është vetëm një aferë financiare. Është historia e një modeli të keqqeverisjes që ka lejuar rrjepjen e resurseve kombëtare, në dëm të një shoqërie që paguan koston me varfëri, sëmundje dhe zhgënjim. Nëse drejtësia nuk vepron, atëherë kemi përballë një tjetër rast të zhdukjes së së vërtetës përpara forcës së parasë dhe pushtetit.
