“Çuni” i Belës tendera dhe nga Veliaj
Ish-kreu i Autoritetit Rrugor Shqiptar (ARRSH) Evis Berberi, u arrestua me urdhër të SPAK më 14 mars 2024, në akuzë për korrupsion dhe pastrim parash.
Bashkë me të në burg përfunduan edhe dy biznesmenët Valter Begaj dhe Ervis Lami, si bashkëpunëtorë në skemën e përfitimit të tenderëve, si pronarë të kompanive që fitonin tenderat fiktivë, por ku përfituesi fundor ishte vetë ish-kreu i ARRSH, Berberi.
Si drejtues i ARRSH, Evis Berberi dyshohet se i ka dhënë rreth 2 milion euro tendera kompnive “DAAM” dhe “Net Group”, ku në një prej tyre ai ka qenë edhe vetë aksioner para se të merrte postet në administratë, teksa dyshohet se ishte pronari “de facto” i tyre.
Por, ish-kreu i ARRSH-së Evis Berberi kishte krijuar lidhje edhe në bashkinë e Tiranës me qëllim marrjen e tenderave publik.
“Ora News” raporton se Prokuroria e Posaçme ka zbuluar një komunikim të bërë në vitin 2020, mes shtetasve Evis Berberi, Valter Begaj dhe Erindi Bejko, ky i fundit Drejtor i Përgjithshëm i Njësive Administrative dhe Emergjencave Civile në Bashkinë Tiranë, në kohën e komunikimit.
Në këto biseda, që tashmë janë në duart e SPAK, shtetasi Evis Berberi e quan ortak të tij shtetasin Valter Begaj.
Në datën 02.03.2020, në orën 11:35, shtetasi Valter Begaj i dërgon shtetasit Evis Berberi mesazhet: “Erind Bejko ka marrë studimin e godinave private, domethënë si instituti por për kompani private
Sh….yt”.
Në orën 11:39, shtetasi Evis Berberi i dërgon mesazh shtetasit Erindi Bejko: “Po shyqyr bre të vi të takoj ortaku im për një punë? Se jam në Londër dhe kthehem të shtunën”.
Në orën 11:41, shtetasi Evis Berberi i dërgon sms shtetasit Valter Begaj: “I shkruajta! I thashë ta takosh ti. Pres përgjigje”.
Në orën 19:00, shtetasi Erindi Bejko i kthen përgjigje shtetasit Evis Berberi: “Ti më çmende me këta ortakët e tu”.
Në orën 19:00, Evis Berberi: “Një kam”!
Në orën 19:00, Erindi Bejko: “Shkruhemi nesër edhe e takojmë”.
Në orën 19:00, Evis Berberi: “Ok ti jap nr tënd?”.
Në orën 19:07, Erindi Bejko: “Yes”.
Në orën 19:08 shtetasi Evis Berberi i dërgon me sms shtetasit Valter Begaj, numrin e shtetasit Erindi Bejko, si dhe i shkruan: “Merre nesër dhe takoje më tha”.
Në orën 21:41, shtetasi Evis Berberi i dërgon me sms shtetasit Erindi Bejko, numrin celular te shtetasit Valter Begaj dhe i shkruan: “Ky është ortaku”.
I pyetur për këto komunikime shtetasi Erindi Bejko ka deklaruar se shtetasi Evis Berberi i ka kërkuar të takojë shtetasin Valter Begaj, të cilin shtetasi Evis Berberi ia ka prezantuar si ortakun e tij.
Ai deklaron se shtetasin Valter Begaj e ka takuar dhe kanë diskutuar në lidhje me dokumentet që duhet të paraqiteshin për të marrë pjesë në këtë procesin e ekspertizës që kërkonte Bashkia Tiranë për pallatet dhe godinat e tjera të dëmtuara nga tërmeti i vitit 2019.
Ai deklaron se doli një akt normativ që normonte procesin e përzgjedhjes se shoqërive nga ana e Bashkisë Tiranë, si dhe masën e shpërblimit te tyre. Kujton që për përzgjedhjen e këtyre shoqërive u mor sektori i prokurimeve në Bashkinë e Tiranës.
