Një ngjarje e rëndë është regjistruar në Tiranë, ku një 31-vjeçar është rrëmbyer dhe mbajtur peng për disa orë.
Sipas Policisë së Shtetit, shtetasi me inicialet L. M. është marrë me forcë dhe futur në një automjet tip ‘Audi’, ku është mbajtur kundër dëshirës së tij për rreth dy orë, gjatë të cilave ka qenë nën presion dhe është dhunuar fizikisht me grushte.
Autori i dyshuar i kësaj ngjarje është shtetasi Dashamir Pira 44-vjeç me banim në Tiranë.
Njoftimi i Policisë:
“Mori me forcë në automjet, një 31-vjeçar, i hoqi lirinë dhe e dhunoi, si rezultat i veprimeve të shpejta të Policisë, kapet në flagrancë dhe vihet në pranga 44-vjeçari.
Shërbimet e Komisariatit të Policisë Nr. 6, pasi morën njoftim se një 31-vjeçar ishte marrë me forcë, në automjet, nga një shtetas, organizuan menjëherë punën për identifikimin e autorit dhe vënien e tij përpara përgjegjësisë ligjore.
Si rezultat i veprimeve të shpejta të kryera nga specialistët për Hetimin e Krimeve të Komisariatit të Policisë Nr. 6, u kap në flagrancë dhe u vu në pranga shtetasi D. P., 44 vjeç, banues në Tiranë.
Nga hetimet dyshohet se 44-vjeçari, për motive të dobëta, ka marrë me forcë, në automjetin e tij, shtetasin L. M., 31 vjeç, i ka hequr lirinë, duke e mbajtur në automjet, për gati 2 orë, dhe e ka goditur me grushte.
Materialet procedurale i kaluan Prokurorisë, për veprime të mëtejshme.”
