Shqiptarët e Kosovës u zhgënjyen, polakët dhe spanjollët po na lënë, por ja kush na “do” më shumë
Turizmi në Shqipëri vazhdon të jetë një ndër sektorët më të rëndësishëm të ekonomisë, por ritmet e rritjes po zbehen. Të dhënat e fundit nga INSTAT për periudhën janar–maj 2025 tregojnë një tablo të përzier: ndonëse hyrjet janë rritur lehtë me 3.9%, krahasuar me rritjen marramendëse 38% të një viti më parë, disa grupe turistësh po tregojnë shenja të qarta “lodhjeje”.
Shqiptarët e Kosovës nga dashuria në ftohje
Kosovarët mbeten grupi më i rëndësishëm që viziton Shqipërinë, duke zënë 33.7% të totalit të vizitorëve. Por pas liberalizimit të vizave në janar 2024, shumë prej tyre po eksplorojnë destinacione të reja në Evropë – madje duke përdorur edhe aeroportin e Rinasit si pikënisje. Greqia po merr një pjesë të mirë të kësaj “dashurie verore”. Rezultati? Rënie me 6.9% e hyrjeve nga Kosova në 5 mujorin e parë të këtij viti.
Polakët dhe spanjollët nga entuziazmi te zhgënjimi
Edhe polakët, një tjetër grup tradicional i rëndësishëm, kanë shënuar një rënie të ndjeshme prej 8.6%. Arsyeja? Çmimet. Rritja e paketave turistike dhe zhvlerësimi i euros kanë ndikuar në negociatat mes agjencive dhe hoteleve shqiptare. Një pjesë e mirë e polakëve këtë vit kanë zgjedhur destinacione më pranë, si Kroacia, e cila ka parë një rritje të ndjeshme të këtij grupi.
Spanjollët nuk janë më të lumtur: edhe ata kanë “votuar me këmbë”, duke ulur ndjeshëm hyrjet me 7.5% krahasuar me vitin e kaluar. Duket se Shqipëria nuk po i bind më si dikur.
Italianët, gjermanët e francezët, të dashuruarit e rinj
Në anën tjetër të medaljes, ka edhe histori suksesi. Italianët po rrisin ndjeshëm prezencën e tyre në vend – 11.6% e totalit të vizitorëve në janar–maj 2025, me një rritje prej 7.8%. Ata e shohin Shqipërinë si një alternativë të përballueshme për fundjava, pushime të shkurtra, por edhe turizëm miks mes shëndetit dhe biznesit.
Franca dhe Gjermania shënojnë rritje spektakolare – përkatësisht 40% dhe 29% më shumë hyrje në krahasim me një vit më parë. Edhe Zvicra dhe Austria janë në rritje të qëndrueshme me mbi 20%.
Shifra dhe pritshmëri
Deri në fund të majit, Shqipërinë e vizituan 3.4 milionë shtetas të huaj – një rritje modeste prej 1.9% krahasuar me 2024. Vetëm në maj hynë 987 mijë vizitorë të huaj, me një rritje prej 1.4% nga viti i kaluar. Por është e qartë se ritmet janë ngadalësuar. Majin e kaluar, rritja ishte 38%.
Kujdes, Shqipëri!
