Adriatik Dosti
Të të mundë Anglia me çfarëdo lloj rezultati dhe aq më shumë në fushën e vet është krejtësisht e pranueshme…
Por të luash siç luajti Shqipëria dje në Wembley të Londrës përballë britanikëve në ndeshjen e parë eliminatore të Botërorit 2026 për mua është krejtësisht e papranueshme… madje e frikshme dhe një kthim mbrapa në vitet tona më të këqija…
Mua absolutisht nuk më shqetëson humbja me Anglinë… por mënyra se si luajtëm, sinqerisht, më alarmon… madje shumë.
Mesfushë inekzistente, mbrojtje që fuste ujë, sidomos nga krahët, dhe një sulm që nuk ndërtoi asnjë aksion të vetëm dhe që s’gjuajti asnjëherë në portën kundërshtare…
Asnjë sulm i mirëfilltë, asnjë aksion në portën e britanikëve dhe asnjë gjuajtje e vetme, qoftë edhe për të provuar portierin Pickford…
Një dominim i frikshëm i anglezëve… Strakosha dhe Gjimshiti na shpëtojnë nga gola të sigurt… por edhe një Shqipëri e trembur që s’arrin dot të kalojë as gjysmën e fushës së saj…
Në të 20-ën, një gabim i Asanit në mbulim i jep mundësi Skelly-t të shënojë golin e parë për vendasit.
Një pjesë e parë që mbyllet 1-0, por edhe 83% – 17% në posedimin dhe mbajtjen e topit nën kontroll në favor të vendasve… s’ka shumë nevojë për komente të tepërta…
Aq më shumë që shpesh mua më dukej sikur anglezët na kishin vjedhur topin e lojës dhe as që kishin ndërmend ta dorëzonin…
As njëfarë lloj përmirësimi në lojën tonë në pjesën e dytë, as ndërrimet e bëra, as prania e Brojës në fushë nuk ua ndërruan mendjen anglezëve që t’u bënin qoftë edhe një tolerim të vetëm djemve të Sylvinhos…
Një Shqipëri inferiore në ekstrem dhe e mundur prej emrit të madh të Anglisë… që përpara se të fillonte ndeshja… dhe për këtë unë personalisht fajësoj së pari dhe më së shumti trajnerin Sylvinho.
Në të 77-ën, gabon Ajeti (që deri në ato momente po luante mirë)… përfiton Kane dhe tregon klasin e tij, 2-0… më pas Strakosha, i dëmtuar, ia lë vendin Kastratit… në fushë janë edhe Pajaziti dhe Hoxha në vend të Asanit dhe Laçit… dhe ndeshja nuk ka më histori… teksa Shqipëria regjistron humbjen e 7-të ndaj Anglisë në 7 ndeshje… me 1 gol të shënuar dhe 21 gola të pësuar… bilanc ky i ndeshjeve zyrtare.
Të hënën, më 24 mars, në fushën tonë përballë Andorrës, që sot u mund në fushën e vet nga Letonia 1-0… kujdes… sepse kundërshtari i radhës është ndër ekipet më të bezdisshme të mundshme, jo vetëm që nuk të lë të luash futboll, por edhe prish ndeshjen…
Formacionet zyrtare të ndeshjes ishin:
Anglia (4-2-3-1): Pickford; Walker, Konsa, Burn, Lewis-Skelly; Rice, Jones; Foden, Bellingham, Rashford; Kane.
Shqipëria (4-2-3-1): Strakosha; Balliu, Ajeti, Gjimshiti, Aliji; Asllani, Ramadani; Asani, Laçi, Bajrami; Uzuni.
