Zëvendës Myftiu i Shkodrës: Mos u largoni nga vendi

Sot qindra mijëra besimtarë myslimanë festojnë ditën e Kurban Bajramit.

Zëvendës Myftiu i Shkodrës Arben Halluni ka dhënë mesazhin e tij në këtë ditë të shënuar për të gjithë besimtarët myslimanë.

Halluni u kërkoi qytetarëve të mos largohen nga vendi.

“Po iu drejtohem me përulësi e respekt, me një thirrje shpirti, zemre. Me një mesazh që buron nga shpirti, për bijtë e kësaj toke që po largohen gjithnjë e më shumë duke lënë pas familjet, rrënjët e të ardhmen. Kryesisht prindërit që i lënë të gjallë e i gjejnë farkeqësisht nën mermer. Thirrja jonë e vazhdueshme është që mos të braktisni vendin tuaj, jo pa bërë përpjekje këtu. Zoti thotë se jeni trashëgimtar në tokë për t’ju sprovuar në tokën tuaj. Rrisku nuk është në tokë të huaj por në tokën tuaj sepse Zoti e shpërblen përpjekjen tuaj. Ikja nuk është zgjidhje.Nuk mund të presim që të tjerët të ndërtojnë vendin tonë, është përgjegjësi e jona dhe e atyre që na drejtojnë”, tha Zëvendës Myftiu i Shkodrës.