I besuari i Ilir Beqes, bleu 10 milionë euro të AKSHI-t, çokollata dhe biskota

Hetimet e SPAK mbi aferën e AKSHI-t kanë zbuluar një nga skemat më absurde dhe alarmante të devijimit të fondeve publike. Sipas të dhënave të reja nga dosja hetimore, rreth 10 milionë euro, të alokuara për shërbime teknologjike (IT), rezultojnë të jenë përdorur për pagesa faturash që lidhen me çokollata, biskota dhe produkte veshjeje.

Në qendër të hetimit janë Andis Papa, pronar formal i kompanisë “Fastech” – i denoncuar publikisht si person i lidhur ngushtë me ish-ministrin Ilir Beqaj, i dyshuar si pronari real – si dhe Rogers Rryta, administrator i kompanisë “Mega Distribution”. Për të dy, GJKKO ka caktuar masën e sigurisë “bllokim i pasaportës”.

Absurdi i skemës: miliona euro IT për produkte “Ulker”

Sipas provave të mbledhura nga BKH, kompanitë që fitonin tendera pranë AKSHI-t, konkretisht “Fastech” dhe “Soft & Solution”, kanë transferuar shuma shumë të mëdha financiare drejt kompanisë ushqimore “Mega Distribution”.

• Periudha: 2018, 2020 dhe 2021
• Shuma: mbi 10 milionë euro
• Përshkrimi i faturave: shitje biskotash dhe çokollatash të markës “Ulker”

Këto transaksione, sipas SPAK, nuk kanë asnjë lidhje me mirëmbajtjen apo zhvillimin e sistemeve teknologjike shtetërore.

Përplasja e dëshmive: nga “shërbime IT” te “biskota nga Turqia”

Dyshimet e hetuesve janë forcuar ndjeshëm pas ndryshimit të versioneve të dhëna nga vetë biznesmenët gjatë marrjes në pyetje.

Rogers Rryta (Mega Distribution) ka deklaruar para BKH-së se kompania e tij operon ekskluzivisht në sektorin ushqimor dhe nuk ka asnjë lidhje me teknologjinë apo shërbimet IT. Sipas tij, 10 milionë eurot përfaqësojnë pagesa për mallra ushqimore të shitura kompanive të IT-së. Ai ka mohuar gjithashtu çdo njohje me emra kyç të dosjes si Ergys Agasi, Mirlinda Karçanaj apo Ermal Beqiri.

Ndërkohë, Andis Papa (Fastech) fillimisht ka pretenduar se pagesat lidhen me shërbime teknologjike. Por, pasi hetuesit i kanë bërë të qartë se “Mega Distribution” tregton vetëm produkte ushqimore, ai ka ndryshuar qëndrim.

“Siç ju thashë, nuk e di mirë çfarë kemi blerë… mbaj mend që sillnin produkte nga Turqia,” mësohet të ketë deklaruar Papa, pa dhënë asnjë shpjegim bindës se pse një kompani IT do të shpenzonte miliona euro për biskota dhe çokollata.

Dyshimet e SPAK: skemë e pastër pastrimi parash

Sipas SPAK, ekziston dyshimi i fortë se “Mega Distribution” është përdorur si një ‘urë financiare’ për të nxjerrë paratë e tenderave jashtë sektorit të IT-së, duke i kamufluar ato si marrëdhënie tregtare për mallra konsumi.

Hetuesit dyshojnë se bëhet fjalë për fatura fiktive ose mbifaturime, të cilat kanë shërbyer për të pastruar fondet publike të përfituara nga AKSHI, duke i kthyer ato në likuiditet të lirë dhe të vështirë për t’u gjurmuar.

Hetimet vijojnë për të zbuluar destinacionin final të këtyre parave, nëse ato janë përdorur për korrupsion të zyrtarëve të lartë, apo janë riinvestuar në pasuri dhe aktivitete të tjera, duke thelluar edhe më tej skandalin që rrethon dosjen e AKSHI-t.