18 orë seancë maratonë në Kuvend, rrëzohen 6 nismat e opozitës

Pas një seance maratonë që zgjati rreth 18 orë, Kuvendi i Shqipërisë miratoi disa projektvendime dhe projektligje të rëndësishme, përfshirë plotësimin e vendeve vakante në Banka e Shqipërisë, si dhe ligjin e ri për shërbimin e jashtëm.

Emërimet në Këshillin Mbikëqyrës të Bankës së Shqipërisë

Me 74 vota pro, 16 kundër dhe asnjë abstenim, deputetët miratuan zgjedhjen e Selami Xhepës si anëtar i Këshillit Mbikëqyrës.

Në një tjetër votim, me 72 vota pro, 19 kundër dhe 1 abstenim, u miratua kandidatura e Holta Zaçajt për të njëjtin organ drejtues.

Po ashtu, me 74 vota pro, 17 kundër dhe asnjë abstenim, u votua emërimi i Ervin Metes si anëtar i Këshillit Mbikëqyrës.

Ndërkohë, me 73 vota pro, 18 kundër dhe asnjë abstenim, u miratua zgjedhja e Jonida Priftit si anëtare e këtij institucioni.

Projektvendimi për zgjedhjen e Matilda Shehut u shty për votim në një seancë tjetër plenare, me kërkesë të Kryetarit të Grupit Parlamentar të Partia Socialiste e Shqipërisë.

Ligji i ri për shërbimin e jashtëm

Kuvendi miratoi me 75 vota pro të maxhorancës ligjin “Për shërbimin e jashtëm në Republikën e Shqipërisë”. Opozita votoi kundër, ndërsa deputeti Redi Muçi i Lëvizja Bashkë abstenoi.

Drafti i ardhur nga Ministria për Evropën dhe Punët e Jashtme parashikon që, brenda 12 muajve nga hyrja në fuqi e ligjit, të gjithë diplomatët në shërbim t’i nënshtrohen një testimi të detyrueshëm për verifikimin e aftësive. Procedurat dhe kriteret do të përcaktohen me akt nënligjor dhe do të zbatohen brenda të njëjtit afat 12-mujor.

Projektligjet e opozitës të rrëzuara

Shumica rrëzoi në bllok gjashtë projektligje të propozuara nga opozita:

Dy nisma nga Ina Zhupa, për trashëgiminë kulturore dhe ndryshime në ligjin për arsimin e lartë;
Dy nga Jorida Tabaku, për statusin e minatorit dhe akcizat;
Një nga grupi parlamentar i Partia e Lirisë, për tatimin mbi vlerën e shtuar dhe analizat laboratorike të ndotësve në ushqim.

Projektligjet morën vetëm 17 vota pro në votimin në parim dhe nuk arritën të kalonin për shqyrtim nen për nen.

Nga ana e maxhorancës, deputeti Erjon Braçe abstenoi në tre prej propozimeve të opozitës, ndryshe nga grupi i tij parlamentar që votoi kundër.

Votimet në Kuvend

Projektligji “Për shërbimin e jashtëm në Republikën e Shqipërisë”
Votimi: 75 pro, 1 abstenim (Redi Muçi), 15 kundër

Projektligji “Për disa ndryshime në ligjin nr. 27/2018 ‘Për Trashëgiminë Kulturore dhe Muzetë’”
Votimi: 17 pro, 0 abstenim, 74 kundër

Projektligji “Për një ndryshim në ligjin nr. 61/2012 ‘Për akcizat në Republikën e Shqipërisë’, të ndryshuar”
Votimi: 17 pro, 1 abstenim (Erjon Braçe), 73 kundër

Projektligji “Për një shtesë në ligjin nr. 80/2015 ‘Për arsimin e lartë dhe kërkimin shkencor në institucionet e arsimit të lartë në Republikën e Shqipërisë’”
Votimi: 17 pro, 0 abstenim, 75 kundër

Projektligji “Për një shtesë në ligjin nr. 92/2014 ‘Për tatimin e vlerës së shtuar në Republikën e Shqipërisë’, të ndryshuar”
Votimi: 17 pro, 1 abstenim (Erjon Braçe), 73 kundër

Projektligji “Për statusin e minatorit”
Votimi: 17 pro, 1 abstenim (Erjon Braçe), 74 kundër

Projektligji “Për domosdoshmërinë e kryerjes së analizave laboratorike për ndotësit ushqimorë”
Votimi: 17 pro, 0 abstenim, 75 kundër

Projektligji “Për disa shtesa dhe ndryshime në ligjin nr. 43/2023 ‘Për qeverisjen elektronike’”
Votimi: 74 pro, 0 abstenim, 16 kundër

Projektvendimi “Për miratimin e planit vjetor 2026, ‘Për zbatimin e programit të statistikave zyrtare 2022–2026’”
Votimi: 74 pro, 0 abstenim, 15 kundër