Raporti më i fundit i Kontrollit të Lartë të Shtetit për vitin 2025 ka zbuluar një hartë rrëqethëse të abuzimit me paratë publike, ku dëmi ekonomik dhe parregullsitë financiare kanë arritur shifrën rekord prej 26.2 miliardë lekësh.
Kjo shifër, e cila është pothuajse tri herë më e lartë se ajo e një viti më parë, dëshmon për një rritje galopante të korrupsionit dhe paaftësisë menaxhuese në nivelet më të larta të administratës, duke u shtrirë nga prokurimet publike deri te menaxhimi i doganave dhe tatimeve.
Në skanerin e audituesve kanë rënë praktika skandaloze që prekin drejtpërdrejt xhepat e qytetarëve. Në fushën e prokurimeve, raporti dëshmon se tenderat janë dhënë përmes trajtimit të pabarabartë, ku ofertat më të ulëta janë skualifikuar qëllimisht për t’u hapur rrugë kontratave më të shtrenjta, ndërsa fonde të tëra janë copëtuar për të shmangur garën e hapur.
Ndërkohë, borxhi i papaguar në Tatime dhe Dogana ka kapërcyer shifrat alarmante prej mbi 211 miliardë lekësh, si pasojë e dështimit të qëllimshëm ose administrativ për të vjelë detyrimet dhe për të bllokuar asetet e debitorëve të mëdhenj.
Goditjen më të rëndë raporti ia jep sektorit të shëndetësisë, ku është konstatuar një “batërdi” me barnat e rimbursueshme. Janë zbuluar mbi 240 mijë njësi ilaçesh që kanë dalë nga depot me datë skadence të njëjtë ose me vetëm pak ditë afat përdorimi, duke rrezikuar jetën e pacientëve në këmbim të rimbursimeve fiktive.
Ky kaos menaxherial vërehet edhe në sigurinë ushqimore dhe mjedis, ku laboratorët e paakredituar dhe mungesa e kontrollit mbi mbetjet e rrezikshme po kthehen në një kërcënim serioz për shëndetin publik.
Skandali thellohet më tej me vrimat e zeza në energjetikë, ku humbjet në rrjet arrijnë deri në 33%, dhe në sektorin e ujit, ku shumica e shoqërive nuk kryejnë dot as analizat bazë të ujit të pijshëm.
KLSH ka vënë në dukje edhe dobësi kritike në sigurinë kibernetike, duke lënë të dhënat shtetërore të ekspozuara ndaj sulmeve. Si rezultat i këtyre gjetjeve tronditëse, institucioni ka dërguar tashmë 8 kallëzime penale dhe ka referuar dhjetëra materiale të tjera në organet e drejtësisë, duke kërkuar ndëshkimin e përgjegjësve për këtë katastrofë financiare.
