7 urdhrat që duhet të nxjerrë Erion Veliaj për Tiranën

Dorjan Teliti, Koordinator për Programin Ekonomik në Partinë Demokratike dhe zv/kryetar i Këshillit Bashkiak të Tiranës, theksoi se kryeqytetit nuk i duhen vetëm drita dekorative, por transparencë dhe masa konkrete për përmirësimin e jetës së qytetarëve.

Teliti i bëri thirrje kryebashkiakut Erion Veliaj të nxjerrë “7 urdhra që ndriçojnë vërtet Tiranën”, duke i cilësuar si të domosdoshme për funksionimin real të qytetit.

“Le të kërkojmë dritën që i duhet realisht Tiranës, jo thjesht drita dekor”, tha Teliti, duke përmendur urdhrat që sipas tij duhet të miratohen menjëherë:

1. Urdhër për Transparencë Totale: Publikimi online i çdo shpenzimi të Bashkisë dhe institucioneve të varësisë, me faturë, zëra dhe afate, për të bërë dritë mbi milionat e zhdukura me gara fiktive.

2. Urdhër Stop Betonizimit: Ndërprerja urgjente e ndërtimit pa kriter në Tiranë, për të ruajtur dritën e diellit dhe ajrin e pastër.

3. Urdhër për Publikimin e Lejeve të Ndërtimit: Të gjitha lejet e dhëna të publikohen online, me detaje për investitorët dhe sipërfaqet, për të bërë dritë mbi ata që po kthejnë Tiranën në një qytet të pabanueshëm.

4. Urdhër Stop Taksidarëve: Ndërprerja e praktikave arbitrare të taksidarëve bashkiakë që dëmtojnë biznesin.

5. Urdhër Përballë Fermerit: Hapja e menjëhershme e Bashkisë ndaj fermerëve, duke iu dhënë mbështetje dhe duke ndalur degradimin e zonave rurale.

6. Urdhër për Shërbëtorët e Qytetit: Çdo drejtor dhe zyrtar të veprojë si shërbëtor i komunitetit dhe jo si “padron i karriges”.

7. Urdhër për Shëndetin dhe Ambientin: Krijimi i zonave me ajër të pastër dhe hapësirave të gjelbra të mbrojtura ligjërisht.

“Këto janë urdhrat që ka nevojë kryeqyteti. Këto janë urdhrat që ndriçojnë vërtet Tiranën!”, përfundoi Teliti.