“7777”/ Ja sa kushton tangërlliku i shqiptarëve

Për herë të parë, Drejtoria e Përgjithshme e Shërbimeve të Transportit Rrugor (DPSHTRR) ka hapur një ankand online për targat e personalizuara të automjeteve, duke u dhënë qytetarëve mundësinë të konkurrojnë për kombinime të veçanta përmes internetit.

Në ankandin e parë janë përfshirë gjashtë targa, ndërsa çmimi fillestar përcaktohet në varësi të kombinimit të shkronjave dhe numrave. Bëhet fjalë për targat Q 888 Q, Q U33 N, 7777, L OND ON, K OSO VA dhe M ON3 Y.

Ndër targat e ofruara, 7777 ka një çmim nisjeje prej 6500 eurosh, ndërsa për M ON3 Y oferta fillestare është 2100 euro.

Në ndryshim nga ankandet e mëparshme, të cilat zhvilloheshin fizikisht, tashmë procesi mund të ndiqet dhe të zhvillohet edhe online. Të interesuarit duhet fillimisht të regjistrohen në platformën e institucionit dhe më pas mund të marrin pjesë në ankand duke paraqitur ofertat e tyre në kohë reale.

Sipas DPSHTRR-së, kalimi i ankandeve në formatin online është pjesë e procesit të modernizimit dhe dixhitalizimit të shërbimeve, duke krijuar një procedurë më të hapur dhe konkurruese për përzgjedhjen e targave të personalizuara.