Edi Rama nuk do të shkëputet kurrë nga droga

Përditësuar më 11 August 2017, 19:10

Basha i kërkon ndihmë qytetarëve: Shqipëria është “damkosur”, e keni për detyrë që…

PUBLIK.live/ E premte, 11 Gusht 2017 17:10 Lideri i opozitës Lulzim Basha i është referuar apelit shqetësues të prokurorit italian të antimafias i cili një ditë më parë deklaronte se grupet mafioze po vriten mes tyre për drogën shqiptare.
Një këmbanë alarmi e ka cilësuar kryetari i PD-së thirrjen e shefit të antimafias duke deklaruar se të gjithë e dinë se eksporti kryesor që ofron Shqipëria prej 4 vitesh është droga.

Sipas kryedemokratit droga do të vazhdojë të mbetet “damka” e Shqipërisë nëse qytetarët, shoqëria civile dhe media nuk do t’i bashkohen opozitës në luftën kundër kriminalizimit të pushtetit dhe përdorimit të parasë së drogës për ta mbajtur atë.
Lulzim Basha kërkon ndihmën e të gjithë qytetarëve dhe premton se të bashkuar politika dhe pushteti që Kryeministri ka krijuar përmes drogës do të rrëzohet.

POSTIMI I BASHËS:

Shefi i Antimafias Italiane, Franko Roberti, i ka rënë edhe një herë këmbanave të alarmit për rrezikun që droga shqiptare po i sjell Italisë, duke fuqizuar krimin e organizuar që ka çuar në përplasje mes grupeve rivale mafioze që kërkojnë kontrollin e rrugëve të drogës nga Shqipëria.

Tashmë prodhimi kryesor i Shqipërisë, eksporti kryesor i Shqipërisë dhe marrëdhënia kryesore që Shqipëria ka me botën është droga. Droga shqiptare është tashmë kërcënim serioz për rendin në Itali dhe vend të tjera europiane.

Në Shqipëri situata është akoma më dramatike sepse tani ekonomia dhe politika dominohen nga droga. Shpëtimi nga kjo gjendje mund të vijë vetëm nga reagimi i gjithë shoqërisë. Partia Demokratike prej katër vjetësh ka paralajmëruar për gjendjen dhe pasojat e pritshme të drogës, ka denoncuar politikanët dhe kriminelët e lidhur me drogën, ka ndërmarrë nisma ligjore kundër futjes në politikë të njerëzve të lidhur me drogën dhe krimin. Por përpjekjet e saj nuk mjaftojnë nëse media, shoqëria civile, intelektualët, biznesi dhe vetë qytetarët nuk reagojnë. Edi Rama nuk do të shkëputet kurrë nga droga, përkundrazi, do të vazhdojë të përdorë paratë e drogës për të fuqizuar pushtetin e tij personal dhe për të blerë e manipuluar opinionin publik.

Partia Demokratike do të vazhdojë të luftojë pa kompromis politikën e drogës, por është detyra e çdokujt që kërkon një shoqëri pa drogë dhe një të ardhme të sigurt të reagojë dhe veprojë për të krijuar së bashku një front kundër drogës dhe politikës së drogës.