Nuk mbulohet dielli me shoshë: Rama ndryshon tre ministra, por Peshku është qelbur nga KOKA

Përditësuar më 28 Korrik 2024, 18:09

Naim Noka

Në një veprim të papritur, kryeministri Edi Rama ka ndryshuar tre ministra në kabinetin e tij, një manovër që të lë pa fjalë e të bën të mendosh për fjalën e urtë të popullit tonë: “Nuk mbulohet dielli me shoshë.” Rama mund të zëvendësojë individët në poste, por problemet e rrënjosura në qeverinë e tij nuk zhduken kaq lehtë. Peshku është qelbur me kohë nga koka, dhe ndërrimi i ministrave duket më shumë si një përpjekje për të shpëtuar fytyrën sesa për të adresuar problemet e vërteta të vendit.

Këta ndryshime vijnë në një kohë kur Shqipëria përballet me sfida të mëdha ekonomike dhe sociale, nga papunësia e lartë deri te korrupsioni që shkatërron çdo shpresë për një të ardhme më të mirë. E megjithatë, kryeministri ynë duket se mendon se zëvendësimi i disa individëve do të jetë i mjaftueshëm për të fshehur dështimet e tij dhe të qeverisë së tij.

Ministrat e rinj mund të sjellin një frymë të re, por pa një ndryshim të thellë në mënyrën se si drejtohet vendi, ata thjesht do të jenë figurantë të rinj në një lojë të vjetër. Korrupsioni është aq i përhapur sa që është bërë pjesë e strukturës së vetë shtetit. Dhe nëse kryeministri nuk është i gatshëm të përballet me këtë të vërtetë, atëherë çdo ndryshim është i kotë.

Një qeveri që merret vetëm me sipërfaqen, që përpiqet të mbulojë diellin me shoshë, nuk mund të presë që të fitojë besimin e popullit. Shqiptarët nuk janë të verbër. Ata e shohin realitetin për atë që është dhe e kuptojnë që ndryshimet kozmetike nuk do të sjellin përmirësim real në jetën e tyre.

Rama mund të ndryshojë ministrat sa herë të dojë, por në fund të ditës, është koka që duhet të ndryshojë. Dhe për aq kohë sa kryeministri vazhdon të injorojë rrënjët e problemeve të vendit, Shqipëria do të mbetet në vendnumëro. Kjo është e vërteta e hidhur që nuk mund të mbulohet, pavarësisht sa shoshë mund të përdorë në kongrese rutinë partie. Agai i partisë e ka humbur simiten…