Landi Çela
Landi Çela
Po të numëroni janë 17 të diela që na ndajnë nga 11 maji dhe pasi të mendoni me qetësi mund të kuptoni se çfarë Edi Rama po përpiqet të arrijë: një platformë elektorale ku mafia, krimi i organizuar dhe korrupsioni bëhen gurë themeli për mbijetesën politike. Kjo nuk është më thjesht një garë për pushtet, por një përpjekje për të shpëtuar veten, familjen dhe gjithë aparatin që ka ndërtuar gjatë viteve.
Pas 17 të dielave që na ndajnë nga zgjedhjet, Rama ka vetëm një objektiv: të sigurojë pandëshkueshmërinë për veten dhe për të gjithë ata që e mbajnë në pushtet. Lista e krizave, hetimeve dhe skandaleve që e ndjekin si hije është e pafundme:
1.Inceneratorët – Dosja që simbolizon përmasat e korrupsionit shtetëror ku miliona euro janë avulluar nga xhepat e qytetarëve.
2.McGonigal dhe manipulimi i FBI-së – Një skandal ndërkombëtar që shënon pikën më të ulët të një kryeministri që përdor agjentë të huaj për të përndjekur kundërshtarët.
3.Porti i Durrësit dhe “investimet strategjike” – Një fasadë për pastrimin e parave dhe përfitime personale, ku qytetarët humbasin gjithçka, ndërsa klanet fitojnë gjithçka.
4.Xibraka dhe call center-at – Skandale që lidhin të vëllain e kryeministrit me aktivitete kriminale që cenojnë ekonominë dhe dinjitetin e shqiptarëve.
5.Tenderët dhe lobimet ndërkombëtare – Nga kontratat e dyshimta për Eco Park te shumat marramendëse për emra si Tony Blair, gjithçka lidhet me një sistem ku pasuria publike vidhet hapur.
Kjo platformë nuk përfshin vetëm shpëtimin e vetvetes, por edhe të ministrave dhe bashkëpunëtorëve të tij më të ngushtë. Nga Belinda Balluku e deri te Erion Veliaj, mbrojtja e tyre është prioriteti i dytë më i rëndësishëm për Ramën, pas vetëmbrojtjes. Veliaj, i akuzuar për disa nga krimet më të rënda që lidhen me korrupsionin dhe shpërdorimin e detyrës, mbetet simboli i pashqetësuar i një shteti të kapur.
Krimi si pjesë e zgjedhjeve
Rama nuk e fsheh më aleancën e tij me krimin e organizuar. Nga “Sinaloa” te “Ndrangheta”, emrat e botës së errët kanë gjetur strehë në Shqipëri, duke funksionuar si një rrjet mbështetës për qëllimet elektorale dhe financiare të qeverisë. Policia dhe drejtësia janë kthyer në vegla të bindura, që jo vetëm që mbulojnë krimin, por edhe e promovojnë atë.
Përtej kësaj, shqiptarët po përballen me një strategji që e largon popullsinë nga vendi. Largimi masiv i të rinjve dhe profesionistëve po shkatërron çdo shpresë për një të ardhme normale. Kjo nuk është një aksident, por një politikë e qëllimshme për të zvogëluar votuesit kritikë dhe për të mbushur hapësirat me klientë të blerë dhe të kontrolluar.
Mafia, vota dhe shkatërrimi i Shqipërisë
Në këto 17 të diela, Edi Rama po e çon Shqipërinë drejt një pike ku çdo strukturë e shtetit, nga qeveria te drejtësia, është kthyer në një instrument elektoral për të mbrojtur interesat e tij dhe të klaneve të tij.
11 maji nuk është thjesht një datë zgjedhjesh, por një betejë për të shpëtuar Shqipërinë nga shndërrimi i saj në një shtet ku mafia dhe politika janë një e vetme. Përballë kësaj platforme kriminale, qytetarët duhet të zgjedhin nëse do të pranojnë të jenë pjesë e një vendi të nëpërkëmbur apo do të luftojnë për të ardhmen e tyre.
