Landi Çela
Sali Berisha nuk e ngre kot një pyetje. Kur ai flet për mesazhe që i vijnë Edi Ramës nga Amerika, diçka ka lëvizur në prapaskenë. Kjo nuk është një lojë politike rutinë, por një sinjal për diçka më të madhe se fushata elektorale. Nuk është hera e parë që drejtësia amerikane zgjedh të veprojë në momentet kur Shqipëria ndodhet në prag zgjedhjesh. Historia e viteve të fundit e ka treguar qartë se kur FBI hyn në lojë, nuk është për të bërë teatër, por për të çuar një mesazh të prerë.
Veliaj, qelia dhe presioni politik
Gjyqtari dhe prokurori që vendosën për arrestin e kryebashkiakut Erion Veliaj janë tashmë në qendër të një presioni brutal. Sulmet verbale dhe strategjia e tensionit të orkestruar nga Veliaj brenda qelisë janë të dukshme: çdo lëvizje e tij është një tentativë për të ndryshuar masën e sigurisë. Por kjo nuk është thjesht një betejë për lirinë e një individi – është një luftë për mbijetesën e një sistemi që ka funksionuar mbi themelet e një bande pushteti. Nëse arrijnë ta ndryshojnë vendimin e drejtësisë, atëherë zgjedhjet e 11 majit nuk kanë më asnjë vlerë. Shqipëria nuk do të jetë më një demokraci, por një arenë ku e drejta vendoset nga kërcënimi dhe trysnia.
“Thjesht gjurmoni paranë”
Për të kuptuar përmasat e kësaj afere, mjafton të ndjekësh rrjedhën e parasë. Sepse aty do të gjesh të gjithë zinxhirin e ortakëve të Veliajt: në qeveri, në bashki, në ministri, në sistemin e drejtësisë dhe në bizneset që kanë mbushur qytetin me beton e tendera të dyshimtë. Nga Komisioni i Ligjeve ku Bushka përpiqet të manipulojë dëshmitarët, te Xhafa që nuk do të dalin në dritë aferat e zyrës së urbanistikës dhe deri te Agaçi, që vuan nën peshën e skandaleve, gjithçka është një sistem i lidhur ngushtë.
Edi Rama nuk ka luksin të luajë rolin e spektatorit. Ai është në qendër të kësaj vorbulle dhe po fundoset bashkë me të gjithë mekanizmin që ka ndërtuar. Sepse nuk është më vetëm çështja e një kryebashkiaku të korruptuar, por e një sistemi të tërë që e ka mbajtur pushtetin përmes presionit, propagandës dhe lidhjeve me para publike.
FBI dhe mesazhi i heshtur nga Amerika
Në këtë kaos, Berisha e di shumë mirë se çfarë po ndodh pas skenave politike. Ai ka qenë vetë subjekt i përplasjes me SHBA dhe është dëshmitar i mënyrës sesi vepron FBI kur hyn në një territor si Shqipëria. Oficerët e saj janë tashmë në Tiranë dhe kanë një agjendë të qartë. Ata nuk e kanë mendjen te zgjedhjet e 11 majit, sepse për ta, çështja është shumë më e thellë. Objektet dhe subjektet janë të përcaktuara me emra.
Sepse në Shqipëri, pushtetarët dhe banditët kanë frikë vetëm nga fuqitë e mëdha, jo nga njëri-tjetri. Ata kanë ndërtuar një sistem ku i forti dominon të dobëtin, por kur në lojë hyjnë perandoritë, atëherë fillon paniku. Pyetja nuk është më nëse drejtësia ndërkombëtare do të veprojë, por kur dhe me çfarë force do ta bëjë këtë.
Një moment vendimtar për shqiptarët
Berisha, me gjithë strategjitë e tij politike, po i referohet një realitet që shqiptarët e ndiejnë çdo ditë: ky sistem nuk mund të zgjasë pafundësisht. Prandaj, pyetja e tij nuk është thjesht një provokim politik, por një sfidë për të gjithë ata që janë përfshirë në këtë aferë: Çfarë ka mësuar Rama nga Amerika?
Ndoshta përgjigja nuk do të vonojë. Dhe kur ajo të vijë, shumë figura që sot duken të paprekshme mund të jenë të parët që do të përballen me drejtësinë. Shqiptarët kanë një mundësi: të mos presin vetëm nga ndërkombëtarët, por të marrin fatin e tyre në duar dhe të pastrojnë nga skena politike ata që duhet të ishin larguar prej kohësh.
Sepse ky vend nuk ka më kohë për të pritur.
