SPAK e tradhtoi fermerin shqiptar
Prej qershorit 2021, një kallëzim penal i rëndë i dorëzuar nga OLAF (Zyra Evropiane Kundër Mashtrimit) në SPAK, e akuzon ish-ministren Frida Krifca dhe 7 vartës të saj për abuzim me plot 138 milionë euro nga fondet IPARD-II, të dhëna për zhvillimin rural në Shqipëri. Por, edhe pas katër vitesh, asnjë hetim i plotë, asnjë marrje në pyetje, asnjë urdhër-arresti. Thjesht… asgjë!
Në vend që të përballej me drejtësinë, Frida Krifca u promovua: fillimisht ministre e Bujqësisë dhe më pas, këshilltare në kabinetin e kryeministrit Edi Rama. Një sinjal i qartë se në Shqipëri nuk jepesh llogari për krimet financiare, por shpërblehesh në majat e pushtetit.
Brukseli dërgon letër, SPAK rri në gjumë
Në mars 2024, OLAF i dërgoi një letër-kujtese zyrtare SPAK-ut, duke kërkuar mbylljen e hetimeve brenda prillit, në të kundërt çështja do të transferohej te EUROJUST, për marrje në pyetje të detyruar në Bruksel. Por edhe pas këtij ultimatumit, SPAK vazhdoi të heshtë.
Eurojust e kërkoi zyrtarisht marrjen në pyetje të Krifcës pasi ajo refuzoi dy herë ftesën për të dëshmuar në Bruksel. Por në vend të veprimit ligjor, SPAK zgjodhi injorimin.
“SPAK-u është kthyer në noteri të heshtjes politike”
Opozita dhe analistët politikë akuzojnë qartë: SPAK është i kapur politikisht dhe po mbron interesat e qeverisë. Kryeministri Rama, që kishte në tavolinë raportin shkatërrues të BE-së që në shtator 2021, vendosi sërish Krifcën si ministre. Sot, ajo është pjesë e kabinetit të tij, me akses të drejtpërdrejtë në vendimmarrje.
Asnjë masë nuk është marrë ndaj saj. As ndaj 7 vartësve të përmendur nga OLAF. As ndaj drejtuesve të AZHBR.
Skema e vjedhjes: nga fermat në resortet e luksit
Fondi IPARD, që duhej të ndihmonte fermerët dhe bujqësinë shqiptare, përfundoi në ndërtimin e hoteleve dhe resorteve luksoze në bregdet. Sipas burimeve nga Brukseli, përfituesit janë emra të njohur të lidhur me pushtetin: Gjergj Luca, Tërmet Peçi dhe të tjerë me lidhje politike, oligarkike apo kriminale.
Në vend të përkrahjes për fermerët, paratë europiane u kthyen në pasuri për një grusht të afërmish të qeverisë.
BE e pezullon ndihmën: “Asnjë cent deri në 2026”
Komisioni Europian ka vendosur pezullimin e plotë të fondeve IPARD për Shqipërinë deri në një njoftim të dytë. Në një komunikim zyrtar, Brukseli i ka bërë të qartë kryeministrit Rama se nuk do të ketë asnjë grant bujqësor në vitin 2026, për shkak të mungesës totale të ndëshkimit për abuzimin me fondet europiane.
Kush mban përgjegjësi?
Përveç Frida Krifcës, përgjegjësia bie mbi të gjithë strukturën e AZHBR-së, Ministrisë së Bujqësisë dhe vetë Kryeministrinë. OLAF dhe EUROJUST dorëzuan dosje të plota në SPAK në shkurt dhe prill 2023. Hetimet e nisura nga BKH u ndërprenë pa asnjë sqarim.
Sot, qeveria shqiptare nuk ka dërguar ende raportin përfundimtar në Këshillin e Europës, duke treguar një qasje të qëllimshme për të mbuluar krimin dhe për të mbrojtur të implikuarit.
Fatura e heshtjes: e paguajnë fermerët
Në fund, janë fermerët shqiptarë që po mbeten pa ndihmë, pa mbështetje dhe pa zhvillim. Të lënë në harresë nga një shtet që shpërblen abuzimin dhe dështimin, ata janë viktima të drejtpërdrejta të një sistemi që përdori ndihmën europiane për pasurimin e njerëzve të pushtetit.
Kjo është Shqipëria e drejtësisë së re: ku krimi promovohet dhe ndëshkimi hesht.
Në një vend normal, Frida Krifca do të ishte sot para drejtësisë. Në Shqipëri, ajo është këshilltare e Kryeministrit.
Ndërsa Brukseli tërheq fondet, dhe fermerët falimentojnë – SPAK i mbyll sytë.
Ky është realiteti që kërkon ndryshim, jo heshtje.
