Luis Enrique, godet sulmuesin e Chelsea-t Pedro, në fytyrë

Finalja e Kupës së Botës për Klube mes Chelsea dhe Paris Saint-Germain nuk përfundoi vetëm me fitoren e thellë 3-0 të londinezëve, por edhe me skena tensioni dhe dhune në fushë pas përfundimit të ndeshjes.

Trajneri i PSG-së, Luis Enrique, u filmua duke goditur sulmuesin e Chelsea-t, João Pedro, në fytyrë, duke e rrëzuar në tokë. Ngjarja ndodhi në përplasjen e tensionuar pas vërshëllimës së fundit, ku duket se gjithçka nisi pas një përplasjeje mes lojtarëve të dy skuadrave.

Pamjet tregojnë se portieri Gianluigi Donnarumma u përfshi gjithashtu në përleshje verbale me lojtarët e Chelsea-t, ndërsa Enrique, fillimisht duke u përpjekur të frenojë situatën, përfundoi duke e goditur Pedro-n, fillimisht në qafë dhe më pas në fytyrë.

João Pedro, 23 vjeç, ra në tokë pas goditjes, ndërsa lojtarët e të dyja skuadrave u përfshinë në debate dhe u desh ndërhyrja e stafit për të qetësuar situatën. Raportohet se gjithçka nisi kur Achraf Hakimi kishte shfaqur nervozizëm ndaj Pedro-s dhe Andrey Santos, duke bërë gjeste që sugjeronin se “flisnin shumë”.

Pavarësisht skandalit, Chelsea festoi fitoren e dytë të një trofeu këtë sezon, pasi më herët kishte fituar edhe Ligën e Konferencës. Trajneri Enzo Maresca udhëhoqi skuadrën drejt një performance mbresëlënëse, ku Cole Palmer shënoi dy gola dhe João Pedro vulosi rezultatin që në pjesën e parë.

Për momentin nuk ka informacion nëse UEFA apo FIFA do të ndërmarrin masa disiplinore ndaj trajnerit Luis Enrique për incidentin e ndodhur.