Subashit i prishet asfalti 10 ditë pasi u shtrua nga “Paqësori”

Skandal në Fier: Rruga e sapo asfaltuar në fshatin Kraps dëmtohet pas 10 ditësh! Banorët akuzojnë Bashkinë dhe kompaninë “Paqësori”

Një tjetër investim i dyshimtë me fondet publike ka shpërthyer në Bashkinë Fier. Vetëm 10 ditë pas përfundimit të punimeve për asfaltimin e rrugës në fshatin Kraps (Griz), rruga ka nisur të degradojë me shpejtësi: çarje, shembje dhe dëmtime serioze në disa segmente.

Banorët kanë publikuar foto që tregojnë qartë cilësinë e mjerueshme të punimeve. Sipas tyre, trashësia e asfaltit nuk kalon 5 cm, ndërsa gjerësia e rrugës nuk respekton parametrat e projektit. Për më tepër, kamionët e Bashkisë Fier, të ngarkuar rëndë, kalojnë çdo ditë në këtë aks duke përshpejtuar degradimin.

“Dua të postoni këtë foto që tregon punimet këtu në zonën tonë. Rruga sapo u përfundua dhe u prish nga kamionët e bashkisë. U ndërtua me trashësi jo më shumë se 5 cm në çdo pjesë. Armando Subashi është përgjegjës për këtë tender bashkë me firmën ‘Paqësori’ nga Lushnja,” – shprehet një qytetar i revoltuar për Publik.al.

Në qendër të akuzave është kryebashkiaku Armando Subashi dhe kompania zbatuese “Paqësori”, të cilët dyshohen për abuzim me fondet publike dhe zbatim fiktiv të projektit.