NASA rikthehet në Hënë: Artemis II, misioni i parë me njerëz pas më shumë se 50 vitesh

NASA ka njoftuar se është gati për një nga misionet më të rëndësishme hapësinore të dekadave të fundit. Në fillim të shkurtit 2026, katër astronautë do të nisen për një fluturim 10-ditor rreth Hënës në kuadër të programit Artemis II, i pari mision me ekuipazh njerëzor drejt Hënës pas misionit historik Apollo 17 në vitin 1972.

Lakiesha Hawkins, zëvendësadministratore e asociuar e NASA-s, deklaroi në konferencën e 23 shtatorit se ky është një moment unik në historinë e eksplorimit hapësinor.

“Dritarja e nisjes mund të hapet më 5 shkurt, por siguria mbetet prioriteti ynë absolut,” theksoi ajo.

Raketa gjigante SLS (Sistemi i Nisjes Hapësinore), e ndërtuar për të mbajtur misione përtej orbitës së Tokës, është gati për fluturim, ndërsa kapsula Orion po i nënshtrohet testeve finale.

Në këtë mision do të marrin pjesë astronautët amerikanë Reid Wiseman, Victor Glover, Christina Koch dhe kanadezi Jeremy Hansen. Edhe pse nuk do të zbarkojnë në sipërfaqe, ata do të udhëtojnë mbi 9,200 kilometra përtej Hënës, më larg se çdo ekip tjetër në historinë e eksplorimit hapësinor.

“Kjo do të jetë një provë e madhe për sistemet e kapsulës Orion dhe mbështetjen jetësore për misionet e ardhshme,” u shpreh drejtori i fluturimit, Jeff Radigan.

Artemis II do të shërbejë si test i madh përpara Artemis III, ku NASA planifikon uljen e parë të njeriut në Hënë pas më shumë se gjysmë shekulli. Objektivi final është krijimi i bazave të përhershme hënore që do të shërbejnë si trampolinë për misione të ardhshme drejt Marsit.

Në të njëjtën kohë, agjencia hapësinore po shqyrton masa të reja mbrojtëse për të shmangur çdo rrezik të mundshëm nga përplasjet me asteroide.