Kush është vlonjati i dyshuar si vrasës i biznesmenit italian

Kamber Sulçaj, 48 vjeç, i shpallur në kërkim për vrasjen e biznesmenit italian Edoardo Sarchi në Tepelenë, rezulton të jetë aksioner në një gurore që operon në zonën e Bratajt, në Selenicë të Vlorës.

Sipas të dhënave zyrtare nga Qendra Kombëtare e Biznesit, Sulçaj zotëron 25% të aksioneve në subjektin “Stone Quramenga”. Aksionarë të tjerë në këtë kompani janë edhe anëtarë të familjes së tij: babai, Delo Sulçaj me 20% dhe vëllai Akil Sulçaj (i njohur edhe me emrin Ermal) me 15%. Pjesa tjetër e aksioneve i përket dy ortakëve të tjerë jashtë familjes.

Përveç biznesit në industrinë e nxjerrjes së gurit, Kamber Sulçaj rezulton të jetë edhe pronar i një stani me bagëti në zonën e tij të origjinës.

E shkuara penale e familjes Sulçaj

Familja Sulçaj nuk është e panjohur për autoritetet ligjzbatuese. Në maj të vitit 2021, në qytetin e Vlorës u arrestua vëllai i Kamberit, Gazmend Sulçaj, së bashku me kushëririn Roel Sulçaj. Ata u kapën në flagrancë me 2,632 fara kanabisi, të destinuara për kultivim dhe shitje.

Ngjarja e rëndë në Tepelenë, ku mbeti i vrarë biznesmeni italian, ka tronditur opinionin publik. Ndërkohë, hetimet për identifikimin dhe kapjen e autorit vijojnë, ndërsa Kamber Sulçaj është në arrati dhe po kërkohet nga policia.