Rama sqaron “lapsusin” me Trump-in: Një shaka mes miqsh

Kryeministri Edi Rama ka reaguar pas jehonës që mori një deklaratë e tij gjatë një samiti ndërkombëtar, ku një batutë e thënë me humor u kthye në titull kryesor në mediat botërore.

Rama sqaroi se bëhej fjalë për një moment miqësor me presidentin e Azerbajxhanit, Ilham Aliyev, dhe në praninë e presidentit francez, Emmanuel Macron, ku ai iu referua me shaka një “lapsusi” të ish-presidentit Donald Trump.

“Një fjali e thënë në humor, në frymën e shoqërisë, papritur u bë titull botëror, ndërsa thelbi i samitit u la në hije. Ishte një moment i gëzueshëm mes miqsh, jo një deklaratë politike,” tha Rama.

Reagimi i Ramës në X:

Ai shtoi se pretendimi se batuta ishte kthyer në “helm politik” ishte i padrejtë, duke theksuar se në të vërtetë Trump ka treguar veten si një lider që “riktheu fjalën ‘paqe’ në fjalorin e Perëndimit” dhe ka arritur marrëveshje paqeje atje ku të tjerët kishin dështuar.

“E gjitha ishte një shaka e lehtë, një moment humori mes njerëzve që janë ndër admiruesit më të mëdhenj të presidentit Trump,” përfundoi Rama.

Është vërtet e jashtëzakonshme mënyra se si funksionon sot media, dhe sesi e ashtuquajtura “viralitet” mund të shtrembërojë kaq lehtë realitetin. Një fjali e thënë me humor, në frymën e shoqërisë, papritmas kthehet në titull botëror të një samiti ku marrin pjesë dhjetëra vende, ndërkohë që gjithçka tjetër, thelbi i vërtetë, bëhet i parëndësishëm.

Por po, ishte kënaqësi sot të isha me mikun tim të vjetër Ilham Aliyev dhe, në praninë e mikut tonë të përbashkët Emmanuel Macron, të bëja referencë ndaj një “lapsusi” të Presidentit Trump se madje edhe Shqipëria arriti të bënte paqe me Azerbajxhanin, ndërkohë që Emmanuel vetë kishte punuar pa u lodhur, për një kohë të gjatë, për të sjellë paqe midis Azerbajxhanit dhe Armenisë.

Një shaka e lehtë, një moment miqësor. Sigurisht, nuk ka problem nëse përhapet, por ta shtrembërosh atë në helm politik është thjesht e padrejtë. Prandaj, le ta sqarojmë:

E vërteta është se Presidenti Trump është treguar një lider që i riktheu fjalës “paqe” vendin e saj në fjalorin e Perëndimit pas shumë vitesh. Dhe po, në një kohë jashtëzakonisht të shkurtër, ai arriti paqe atje ku të tjerët provuan por dështuan, dhe vazhdon ta ndjekë atë me këmbëngulje.

Ajo shkëmbim fjalësh nuk ishte gjë tjetër veçse një moment humori të mirë mes njerëzve që, në fakt, janë ndër admiruesit më të mëdhenj të Presidentit Trump.