Anulohet takimi Trump-Putin, zbulohet arsyeja

Shtetet e Bashkuara kanë anuluar takimin e planifikuar midis Presidentit Donald Trump dhe Presidentit rus Vladimir Putin, pasi Moska i dërgoi Uashingtonit një memo me kushte të ashpra për një armëpushim në Ukrainë, raportoi Financial Times.

Takimi ishte parashikuar të zhvillohej në Budapest, Hungari, pas një marrëveshjeje paraprake mes dy liderëve për të diskutuar mbi përfundimin e luftës Rusi–Ukrainë. Megjithatë, vetëm disa ditë pas njoftimit, Trump vendosi papritur ta anulojë samitin.

Sipas burimeve të Financial Times, Ministria e Jashtme ruse i kishte dërguar një dokument zyrtar administratës amerikane, ku përfshiheshin kërkesa si dorëzimi i disa territoreve ukrainase, demilitarizimi i vendit dhe garancia se Ukraina nuk do t’i bashkohet kurrë NATO-s.

Vendimi për anulimin e takimit erdhi pas një bisede telefonike mes ministrit të Jashtëm rus, Sergei Lavrov, dhe Sekretarit të Shtetit të SHBA-së, Marco Rubio. Gjatë komunikimit, Rubio thuhet se i ka raportuar presidentit amerikan se Moska nuk kishte treguar gatishmëri reale për negociata.

Ndërkohë, përpjekjet e Uashingtonit për të ndërmjetësuar një armëpushim midis Rusisë dhe Ukrainës kanë hasur në pak mbështetje ndërkombëtare, pavarësisht deklaratave të mëparshme të Trump se mund t’i japë fund luftës “brenda pak ditësh”.

Në fillim të këtij muaji, presidenti amerikan zhvilloi një takim të tensionuar me homologun ukrainas, Volodymyr Zelensky, ndërsa ndihma ushtarake amerikane për Kievin vijon të dërgohet pa ndërprerje.