‘Armën e bleva në Temu’, zbardhet dëshmia e policit ‘fake’ të Kamzës

Janë zbardhur detaje nga dosja e 20-vjeçarit Ervis Brasha, i cili është nën hetim nga Prokuroria e Tiranës, pas referimit nga Policia e Shtetit.

Brasha akuzohet për “falsifikim të dokumenteve”, “mbajtje pa të drejtë e uniformës”, “përvetësim të titullit apo detyrës shtetërore” dhe “prodhim dhe mbajtje pa leje të armëve të gjuetisë dhe sportive”.

Rasti u zbulua nga shërbimet e patrullës së Komisariatit nr.5 Kamëz, kur Brasha u ndalua në mjetin me targë AB252VO, i veshur me uniformë të Policisë së Shtetit, duke mbajtur grada dhe stema.

Pas verifikimeve në sallën operative, u konstatua se ai nuk ishte punonjës i Policisë së Shtetit. Në automjet iu gjetën:

• 4 spaleta të Policisë së Shtetit me grada;

• 2 stema gjoksi N/Komisar dhe Komisar;

• 2 stema me simbole të Policisë;

• 3 dokumenta identifikimi të dyshuar të falsifikuar nga Drejtoria Vendore e Policisë së Shtetit;

• 1 dokument nga Bashkia e Tiranës – Policia Bashkiake, gjithashtu i dyshuar i falsifikuar.

Në dosje përmendet se Brasha ka rrëfyer:

“Para 4 muajsh kam qenë punonjës i policisë bashkiake Tiranë, por e lashë këtë detyrë për t’u bërë pjesë e Policisë së Shtetit. Kam aplikuar, por nuk i kam kaluar të gjitha etapat e kualifikimit. E kam pasion të jem polic, prandaj kam mbajtur uniformat.”

Në lidhje me armën, Brasha tha se ishte armë imitim, e blerë online në platformën Temu, ndërsa dokumentet i kishte printuar dhe plastifikuar gjatë kohës kur punonte në policinë bashkiake. Mjeti që përdorte ishte marrë me qira në zonën e Astirit.

Ai deklaroi se do të japë shpjegime të mëtejshme përpara gjykatës.