Stuhia Byron “mbërthen” Greqinë me përmbytje dhe stuhi të forta

Moti i keq ka goditur fuqishëm Greqinë, duke sjellë reshje të dendura dhe stuhi të forta në disa rajone, sipas Observatorit Kombëtar të Athinës.

Rreth orës 12:30, banorët dhe vizitorët në zonat e Evrotas dhe Mani Lindore morën një mesazh paralajmërues nga shërbimi emergjent “112”, ku u kërkohej të kufizonin lëvizjet vetëm në raste domosdoshmërie, për shkak të shiut të rrëmbyeshëm dhe rrëshqitjeve të dheut në bashkinë e Manit Lindore, në njësinë rajonale të Lakonisë.

Problemet nuk vonuan të shfaqeshin.

Në Gytheio, uji ka mbuluar banesa, toka të mbjella, automjete dhe makineri bujqësore. Banorët e zonës e përshkruajnë situatën si “katastrofë biblike”.

Edhe Zakynthos është përfshirë nga përmbytjet; në Alykes rrugët janë kthyer në rrjedha uji, duke detyruar autoritetet të këshillojnë qytetarët që të mos lëvizin, përveç rasteve të emergjencës.

Ndërkohë, që prej orës 10:00 është pezulluar i gjithë qarkullimi i automjeteve në segmentin e Autostradës Egnatia, nga kryqëzimi lindor deri në kryqëzimin perëndimor të Komotinit, në drejtimin Aleksandropoli–Xanthi.

Si masë paraprake, kryetarët e bashkive të Rodosit, Symit, Kastelorizos dhe Tilos kanë vendosur që të gjitha institucionet arsimore në këta ishuj të mos hapen nesër.