Lista e të huajve më të rrezikshëm në SHBA, mes tyre edhe shqiptarë

Departamenti Amerikan i Sigurisë Kombëtare (DHS) ka publikuar listën e parë zyrtare të të huajve më të rrezikshëm të arrestuar nga Shërbimi i Imigracionit dhe Doganave (ICE), në kuadër të operacionit të nisur nga administrata e Presidentit Donald Trump për deportime masive.

Sipas njoftimit zyrtar, operacioni përqendrohet tek personat me dosje të rënda kriminale, ndërsa DHS thekson se “po nis goditjen e emigracionit të paligjshëm duke filluar nga më të këqijtë e më të këqijve”.

Mes të arrestuarve, autoritetet amerikane kanë përfshirë katër shtetas shqiptarë:

• Vasil Vukaj, i dënuar për vrasje – arrestuar në Kaliforni.

• Florjan Delija, i dënuar për sulm fizik – arrestuar në Nju Jork.

• Adush Muçaj, i dënuar për sulm – arrestuar në Jutah.

• Marian Makai, i dënuar për vjedhje, sjellje të parregullt dhe kërcënime terroriste – arrestuar në Kaliforni.

Po ashtu, në listën e ICE përfshihen edhe dy kosovarë: Nikollë Lleshaj dhe Besart Hoxha.

Autoritetet amerikane bëjnë me dije se prioritet i operacioneve mbeten individët me rekorde kriminale dhe ata që paraqesin rrezik për sigurinë publike. Faza e dytë e deportimeve pritet të nisë në javët dhe muajt në vijim, duke përfshirë një numër edhe më të madh të personave të rrezikshëm.