“Gazetarët, të lirë të shpikin, s’do të dënohen”

Gjatë konferencës së fundvitit me gazetarët, kryeministri Edi Rama u shpreh se opozita, sipas tij, po përpiqet të krijojë zhurmë politike pasi ka humbur pushtetin dhe përfitimet që lidhen me të. Ai deklaroi se kjo humbje ka shtyrë kundërshtarët politikë të ekzagjerojnë çdo çështje dhe të ndërtojnë akuza të sajuara.

Rama foli edhe për lirinë e medias, duke theksuar se gazetarët sot, sipas tij, nuk përballen më me ndëshkime penale për raportimet e tyre, edhe kur këto përmbajnë elementë shpifjeje. Ai shtoi se shpesh mjafton të merret një pjesë e vogël e së vërtetës, t’i shtohet një histori e trilluar dhe ajo paraqitet si fakt i besueshëm për publikun.

Kreu i qeverisë theksoi se familja e tij politike është e madhe dhe se gjatë viteve janë evidentuar dhjetëra raste ku individë të lidhur me mazhorancën janë përballur me akuza për vepra të ndryshme penale, kryesisht gjatë mandateve të para qeverisëse. Sipas tij, “kazani” ka prodhuar shumë zhurmë dhe “tenxheret” kanë qenë të shumta, por ai nënvizoi se qeveria nuk pret rrëzimin e saj nga këto zhurma.

Ai shtoi se thirrjet për rrëzim të qeverisë nuk vijnë nga prova reale, por nga një opozitë që ka humbur privilegje të mëdha dhe që, sipas tij, synon të fryjë çdo çështje për interes politik.