SHBA ngrin vizat për Shqipërinë, ambasada zbardh detajet e vendimit

Duke nisur nga 21 janari 2026, Departamenti i Shtetit i Shteteve të Bashkuara do të pezullojë përkohësisht lëshimin e të gjitha vizave emigruese për aplikantët që janë shtetas të një liste të gjerë vendesh, mes të cilave përfshihet edhe Shqipëria.

Lajmi është bërë publik përmes një postimi në rrjetet sociale nga Ambasada Amerikane, e cila sqaron se ky vendim vjen në kuadër të një rishikimi të plotë të politikave, rregulloreve dhe udhëzimeve të emigracionit nga ana e Departamentit të Shtetit.

Sipas njoftimit, qëllimi i këtij rishikimi është të sigurohet që emigrantët nga vendet e konsideruara me rrezik të lartë të përdorimit të ndihmave sociale të mos përbëjnë barrë financiare për sistemin amerikan. Administrata thekson se emigrantët duhet të jenë financiarisht të vetë-mjaftueshëm.

Çfarë parashikon pezullimi

Pavarësisht pezullimit të lëshimit të vizave:

• Aplikantët mund të paraqesin aplikimet për vizë emigruese;

• Intervistat do të zhvillohen normalisht;

• Takimet do të caktohen nga autoritetet amerikane;

Megjithatë, asnjë vizë emigruese nuk do të lëshohet për shtetasit e vendeve të përfshira gjatë periudhës së pezullimit.

Përjashtime

Nga ky vendim përjashtohen shtetasit me dyshtetësi, në rastet kur ata aplikojnë me një pasaportë të vlefshme të një vendi që nuk është në listën e prekur.

Po ashtu, Departamenti i Shtetit sqaron se:

• Asnjë vizë emigruese e vlefshme aktualisht nuk është anuluar;

• Çështjet që lidhen me hyrjen në SHBA trajtohen nga Departamenti i Sigurisë Kombëtare.

Nuk preken vizat turistike

Pezullimi nuk zbatohet për vizat turistike, studimore apo të tjera jo-emigruese. Vendimi prek vetëm vizat emigruese.

Lista e vendeve të prekura

Në listën e publikuar përfshihen dhjetëra shtete nga Europa, Afrika, Azia dhe Amerika Latine, mes tyre: Shqipëria, Kosova, Maqedonia e Veriut, Mali i Zi, Bosnje dhe Hercegovina, si dhe vende të tjera si Afganistani, Irani, Iraku, Rusia, Brazili, Egjipti, Nigeria, Pakistani, Siria, Sudani, Jemeni, etj.

Vendimi hyn në fuqi më 21 janar 2026 dhe mbetet i vlefshëm deri në përfundimin e rishikimit të plotë të politikave të emigracionit nga Departamenti i Shtetit.

POSTIMI I AMBASADËS SË SHBA:

Përditësime mbi Përpunimin e Vizave Emigruese për Shtetasit nga Vendet me Rrezik të Lartë të Përdorimit të Përfitimeve Publike

Presidenti Trump ka bërë të qartë se emigrantët duhet të jenë financiarisht të vetë-mjaftueshëm dhe të mos përbëjnë barrë financiare për amerikanët. Departamenti i Shtetit po kryen një rishikim të plotë të të gjitha politikave, rregulloreve dhe udhëzimeve për të siguruar që emigrantët nga këto vende me rrezik të lartë të mos përdorin ndihma sociale në Shtetet e Bashkuara dhe të mos konsiderohen barrë publike.

Duke filluar nga 21 janari 2026, Departamenti i Shtetit do të pezullojë lëshimin e të gjitha vizave emigruese për aplikantët që janë shtetas të vendeve të mëposhtme:

Afganistan, Shqipëri, Algjeri, Antigua dhe Barbuda, Armeni, Azerbajxhan, Bahamas, Bangladesh, Barbados, Bjellorusi, Belize, Butan, Bosnje dhe Hercegovinë, Brazil, Birmani, Kamboxhia, Kamerun, Kepi i Gjelbër, Kolumbi, Bregu i Fildishtë, Kubë, Republika Demokratike e Kongos, Dominikë, Egjipt, Eritre, Etiopi, Fixhi, Gambia, Gjeorgji, Ganë, Grenadë, Guatemalë, Guine, Haiti, Iran, Irak, Xhamajkë, Jordani, Kazakistan, Kosovë, Kuvajt, Republika e Kirgistanit, Laos, Liban, Liberi, Libi, Moldavi, Mongoli, Mali i Zi, Marok, Nepal, Nikaragua, Nigeri, Maqedoni e Veriut, Pakistan, Republika e Kongos, Rusi, Ruandë, Shën Kits dhe Nevis, Shën Luçia, Shën Vincent dhe Grenadinat, Senegal, Sierra Leone, Somali, Sudani i Jugut, Sudan, Siri, Tanzani, Tajlandë, Togo, Tunizi, Ugandë, Uruguai, Uzbekistan dhe Jemen.

Pyetje të Shpeshta

Çfarë ndodh me takimin tim për intervistën e vizës emigruese?

Aplikantët për vizë emigruese që janë shtetas të vendeve të prekura mund të dorëzojnë aplikimet për vizë dhe të marrin pjesë në intervista, dhe Departamenti do të vazhdojë të caktojë takime për aplikantët, por asnjë vizë emigruese nuk do të lëshohet për këta shtetas gjatë kësaj periudhe pezullimi.

A ka ndonjë përjashtim?

Shtetasit me dyshtetësi që aplikojnë me një pasaportë të vlefshme të një vendi që nuk është i listuar më sipër janë të përjashtuar nga ky pezullim.

A ndikon kjo në vizën time aktuale të vlefshme?

Asnjë vizë emigrimi nuk është hequr si pjesë e këtij udhëzimi. Për pyetje që lidhen me hyrjen në Shtetet e Bashkuara, ju referojmë te Departamenti i Sigurisë Kombëtare i Shteteve të Bashkuara.

A zbatohet kjo për vizat turistike?

Jo, ky pezullim zbatohet vetëm për aplikantët e vizave emigruese. Vizat turistike janë viza jo-emigruese.