Kryetari i Partisë Mundësia, Agron Shehaj, ka deklaruar se mbështetja ndërkombëtare për SPAK-un është e vazhdueshme dhe e qartë, ndërsa sulmet ndaj këtij institucioni vijnë kryesisht nga politika e vjetër shqiptare.
Sipas Shehajt, pothuajse çdo ditë përfaqësues të vendeve perëndimore vizitojnë SPAK-un për të shprehur mbështetjen në luftën kundër korrupsionit. Ai theksoi se diplomatë nga SHBA, Gjermania, Italia, Holanda, Franca, Britania e Madhe dhe vende të tjera kanë shprehur publikisht mbështetje për punën e këtij institucioni.
Në të njëjtën kohë, sipas tij, SPAK-u është objekt sulmesh dhe linçimesh të vazhdueshme nga figura të njohura të klasës së vjetër politike. Shehaj përmendi se kritikat dhe akuzat ndaj drejtësisë së re vijnë herë nga kryeministri Edi Rama, herë nga Sali Berisha, Ilir Meta, Erion Veliaj, Belinda Balluku, si edhe nga media dhe opinionistë të lidhur me ta.
Shehaj u shpreh se ka ardhur momenti që qytetarët të pozicionohen qartë në krah të drejtësisë dhe kundër korrupsionit. Për këtë arsye, Partia Mundësia ka nisur një nismë për mbledhjen e firmave në mbështetje të një drejtësie të pavarur dhe të pandikuar politikisht.
Sipas tij, synimi është mbledhja e 100 mijë firmave, të cilat do t’i përcillen edhe Kongresit amerikan si një dëshmi e vullnetit qytetar për luftën kundër pandëshkueshmërisë. Deri më tani, Shehaj bëri të ditur se janë mbledhur rreth 20 mijë firma, ndërsa fushata vijon për të arritur numrin e plotë.
Ai theksoi se politikanët që kanë mbajtur poste të rëndësishme gjatë 35 viteve të fundit duhet të përballen me drejtësinë dhe u bëri thirrje qytetarëve që të firmosin masivisht në mbështetje të kësaj kauze.
“Është koha që shqiptarët të zgjedhin drejtësinë dhe të mbështesin luftën kundër korrupsionit,” u shpreh Shehaj, duke i ftuar qytetarët të bëhen pjesë aktive e kësaj nisme.
