Ka ndërruar jetë në moshën 96-vjeçare Tomor Dosti, dy herë deputet i Partisë Demokratike.
Dosti lindi në Gjirokastër në vitin 1930 dhe ishte i biri i ish-ministrit Hasan Dosti. Fëmijëria e tij u shënua nga persekutimet; pasi babai dhe vëllai u arratisën dhe nëna iu pushkatua nga gjermanët gjatë largimit nga Tirana, ai dhe vëllezërit e motrat e tij u përballën me represion të vazhdueshëm. Në vitin 1953, Dosti u arrestua dhe u dënua me 25 vjet heqje lirie për “tentativë arratisjeje”. Burgun e vuajti në Burrel, mes figurave të shquara të historisë së Shqipërisë, ndërsa pas lirimit përjetoi internimin familjar.
Në vitin 1991 iu bashkua Partisë Demokratike, duke sjellë kredibilitetin politik dhe influencën e familjes së tij në jug të vendit. Së bashku me figura të tjera të njohura si Pjetër Arbnori, Leka Totën, Uran Butka, Ajet Rusi dhe vëllain e tij Lekën, ai ndihmoi në formimin e një profili të djathtë të partisë, me moralitet kombëtar, të panjohur për 45 vjet.
Tomor Dosti shërbeu si nënkryetar i PD në vitet e para të themelimit dhe u zgjodh deputet në dy legjislatura, 1991–1996. Në vitin 1998 u tërhoq nga politika aktive, duke lënë pas një kontribut të rëndësishëm në rikthimin e demokracisë në Shqipëri.
