Kushtetuesja rrëzon ish-kreun e ARRSH, Evis Berberin

Ish-drejtori i Autoritetit Rrugor Shqiptar, Evis Berberi, do të vijojë të qëndrojë në masën e sigurisë “arrest me burg”, pasi Gjykata Kushtetuese e Shqipërisë ka rrëzuar kërkesën e tij për shfuqizimin e saj.

Në ankimimin e paraqitur, Berberi kishte kundërshtuar vlefshmërinë e provave të mbledhura nga SPAK, duke pretenduar se ato janë siguruar në kundërshtim me Kushtetutën dhe, për rrjedhojë, masa e arrestit duhet të hiqej.

Megjithatë, Gjykata Kushtetuese nuk e ka marrë në shqyrtim këtë pretendim, duke lënë në fuqi vendimet e mëparshme të organeve të drejtësisë. Si pasojë, masa e sigurisë ndaj ish-zyrtarit mbetet e pandryshuar.

Vendimi i fundit konfirmon vijimin e procedurave ndaj Berberit në rrugë të zakonshme gjyqësore, ndërsa pretendimet e tij për paligjshmëri të provave nuk u konsideruan për shqyrtim nga gjykata më e lartë kushtetuese në vend.