Gara për kreun e policisë hyn në ‘finalen e heshtur’

Procesi për përzgjedhjen e drejtorit të ri të Policisë së Shtetit vijon të mbetet i paqartë, ndonëse afatet zyrtare për shpalljen e kandidaturës duket se janë tejkaluar. Edhe pas përfundimit të 48 orëve nga seanca e fundit dëgjimore me 14 kandidatët në garë, Ministria e Brendshme nuk ka publikuar ende renditjen me pikë.

Megjithatë, burime jozyrtare bëjnë me dije se në krye të listës së vlerësimit qëndron Tonin Vocaj, i cili konsiderohet kandidati më i favorizuar nga procesi i deritanishëm. Pas tij renditet Lorenc Panganika, një tjetër emër i fortë në këtë garë.

Sipas të njëjtave burime, lista e kandidatëve më të vlerësuar i është dorëzuar ministrit të Brendshëm Besfort Lamallari, i cili më pas ia ka përcjellë për shqyrtim kryeministrit Edi Rama. Vendimi përfundimtar pritet të merret në nivel qeveritar në ditët në vijim.

Gara për kreun e ri të policisë u hap pas largimit nga detyra të Ilir Proda më 1 mars, duke hyrë tashmë në fazën më vendimtare. Pas një procesi filtrimi, 14 kandidatë kaluan në testimet përfundimtare dhe intervistat pranë Ministrisë së Brendshme.

Komisioni i posaçëm, i përbërë nga përfaqësues të institucioneve të sigurisë dhe strukturave përkatëse, ka zhvilluar vlerësimin teknik dhe profesional të kandidatëve, ndërsa gjithë procesi është ndjekur nga afër edhe nga partnerët ndërkombëtarë.

Përzgjedhja e drejtuesit të ri të Policisë së Shtetit konsiderohet një moment i rëndësishëm për konsolidimin e reformave në sektorin e sigurisë dhe forcimin e rendit publik në vend.