Ndryshime të tjera në Policinë e Shtetit, zbardhen lëvizjet e fundit të Hitës

Lëvizje të reja janë bërë në radhët e Policisë së Shtetit, duke prekur disa nga strukturat kyçe të saj në qarqe të ndryshme të vendit. Ndryshimet përfshijnë emërime dhe zhvendosje në drejtori kufitare dhe komisariate, në kuadër të riorganizimit të brendshëm.

Arbër Zemani është caktuar në krye të Drejtorisë së Kufirit në Vlorë. Ndërkohë, drejtuesi i mëparshëm i këtij institucioni është transferuar si specialist pranë Drejtorisë së Antiterrorit.

Nga ana tjetër, Agim Basha, i ardhur nga Akademia e Sigurisë, është emëruar Drejtor i Kufirit në Shkodër, duke marrë një rol drejtues në një nga zonat më të rëndësishme kufitare të vendit.

Në Durrës, drejtimin e Kufirit e ka marrë Altin Lila, ndërsa Ermal Lila është zhvendosur në Drejtorinë e Përgjithshme të Policisë së Shtetit, ku do të ushtrojë detyrën e specialistit.

Ndërkohë, në kryeqytet, Alfred Cenaj është emëruar shef i Komisariatit të Policisë nr. 2 në Tiranë, një nga strukturat më të rëndësishme për rendin dhe sigurinë publike.

Këto lëvizje vijnë në kuadër të përditësimeve të vazhdueshme në strukturat e sigurisë, me synim rritjen e eficiencës dhe forcimin e kontrollit në territor.